Lokantagamanasutta

sn35.116:8.1 “Yaṁ kho vo, āvuso, bhagavā saṅkhittena uddesaṁ uddisitvā vitthārena atthaṁ avibhajitvā uṭṭhāyāsanā vihāraṁ paviṭṭho:

sn35.116:8.2 ‘nāhaṁ, bhikkhave, gamanena lokassa antaṁ ñāteyyaṁ, daṭṭheyyaṁ, patteyyanti vadāmi.

sn35.116:8.3 Na ca panāhaṁ, bhikkhave, appatvā lokassa antaṁ dukkhassa antakiriyaṁ vadāmī’ti,

sn35.116:8.4 imassa khvāhaṁ, āvuso, bhagavatā saṅkhittena uddesassa uddiṭṭhassa vitthārena atthaṁ avibhattassa vitthārena atthaṁ ājānāmi.

sn35.116:8.5 Yena kho, āvuso, lokasmiṁ lokasaññī hoti lokamānī—

sn35.116:8.6 ayaṁ vuccati ariyassa vinaye loko.

sn35.116:8.7 Kena cāvuso, lokasmiṁ lokasaññī hoti lokamānī?

sn35.116:8.8 Cakkhunā kho, āvuso, lokasmiṁ lokasaññī hoti lokamānī.

sn35.116:8.9 Sotena kho, āvuso …

sn35.116:8.10 ghānena kho, āvuso …

sn35.116:8.11 jivhāya kho, āvuso, lokasmiṁ lokasaññī hoti lokamānī.

sn35.116:8.12 Kāyena kho, āvuso …

sn35.116:8.13 manena kho, āvuso, lokasmiṁ lokasaññī hoti lokamānī.

sn35.116:8.14 Yena kho, āvuso, lokasmiṁ lokasaññī hoti lokamānī—

sn35.116:8.15 ayaṁ vuccati ariyassa vinaye loko.

sn35.116:8.16 Yaṁ kho vo, āvuso, bhagavā saṅkhittena uddesaṁ uddisitvā vitthārena atthaṁ avibhajitvā uṭṭhāyāsanā vihāraṁ paviṭṭho:

sn35.116:8.17 ‘nāhaṁ, bhikkhave, gamanena lokassa antaṁ ñāteyyaṁ, daṭṭheyyaṁ, patteyyanti vadāmi.

sn35.116:8.18 Na ca panāhaṁ, bhikkhave, appatvā lokassa antaṁ dukkhassa antakiriyaṁ vadāmī’ti,

sn35.116:8.19 imassa khvāhaṁ, āvuso, bhagavatā saṅkhittena uddesassa uddiṭṭhassa vitthārena atthaṁ avibhattassa evaṁ vitthārena atthaṁ ājānāmi.

sn35.116:8.20 Ākaṅkhamānā ca pana tumhe āyasmanto bhagavantaṁyeva upasaṅkamitvā etamatthaṁ paṭipuccheyyātha.

sn35.116:8.21 Yathā vo bhagavā byākaroti tathā naṁ dhāreyyāthā”ti.