Yogakkhemisutta

sn35.104:1.1 Sāvatthinidānaṁ.

sn35.104:1.2 “Yogakkhemipariyāyaṁ vo, bhikkhave, dhammapariyāyaṁ desessāmi.

sn35.104:1.3 Taṁ suṇātha.

sn35.104:1.4 Katamo ca, bhikkhave, yogakkhemipariyāyo dhammapariyāyo?

sn35.104:1.5 Santi, bhikkhave, cakkhuviññeyyā rūpā iṭṭhā kantā manāpā piyarūpā kāmūpasaṁhitā rajanīyā.

sn35.104:1.6 Te tathāgatassa pahīnā ucchinnamūlā tālāvatthukatā anabhāvaṅkatā āyatiṁ anuppādadhammā.

sn35.104:1.7 Tesañca pahānāya akkhāsi yogaṁ, tasmā tathāgato ‘yogakkhemī’ti vuccati …pe…

sn35.104:1.8 santi, bhikkhave, manoviññeyyā dhammā iṭṭhā kantā manāpā piyarūpā kāmūpasaṁhitā rajanīyā.

sn35.104:1.9 Te tathāgatassa pahīnā ucchinnamūlā tālāvatthukatā anabhāvaṅkatā āyatiṁ anuppādadhammā.

sn35.104:1.10 Tesañca pahānāya akkhāsi yogaṁ, tasmā tathāgato ‘yogakkhemī’ti vuccati.

sn35.104:1.11 Ayaṁ kho, bhikkhave, yogakkhemipariyāyo dhammapariyāyo”ti.

sn35.104:1.12 Paṭhamaṁ.