Suddhikasutta

sn31.1:1.1 Ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme …pe…

sn31.1:1.2 bhagavā etadavoca:

sn31.1:1.3 “gandhabbakāyike vo, bhikkhave, deve desessāmi.

sn31.1:1.4 Taṁ suṇātha.

sn31.1:1.5 Katamā ca, bhikkhave, gandhabbakāyikā devā?

sn31.1:1.6 Santi, bhikkhave, mūlagandhe adhivatthā devā.

sn31.1:1.7 Santi, bhikkhave, sāragandhe adhivatthā devā.

sn31.1:1.8 Santi, bhikkhave, pheggugandhe adhivatthā devā.

sn31.1:1.9 Santi, bhikkhave, tacagandhe adhivatthā devā.

sn31.1:1.10 Santi, bhikkhave, papaṭikagandhe adhivatthā devā.

sn31.1:1.11 Santi, bhikkhave, pattagandhe adhivatthā devā.

sn31.1:1.12 Santi, bhikkhave, pupphagandhe adhivatthā devā.

sn31.1:1.13 Santi, bhikkhave, phalagandhe adhivatthā devā.

sn31.1:1.14 Santi, bhikkhave, rasagandhe adhivatthā devā.

sn31.1:1.15 Santi, bhikkhave, gandhagandhe adhivatthā devā.

sn31.1:1.16 Ime vuccanti, bhikkhave, gandhabbakāyikā devā”ti.

sn31.1:1.17 Paṭhamaṁ.