Piyasutta

sn3.4:1.1 Sāvatthinidānaṁ.

sn3.4:1.2 Ekamantaṁ nisinno kho rājā pasenadi kosalo bhagavantaṁ etadavoca:

sn3.4:1.3 “idha mayhaṁ, bhante, rahogatassa paṭisallīnassa evaṁ cetaso parivitakko udapādi:

sn3.4:1.4 ‘kesaṁ nu kho piyo attā, kesaṁ appiyo attā’ti?

sn3.4:1.5 Tassa mayhaṁ, bhante, etadahosi:

sn3.4:1.6 ‘ye ca kho keci kāyena duccaritaṁ caranti, vācāya duccaritaṁ caranti, manasā duccaritaṁ caranti;

sn3.4:1.7 tesaṁ appiyo attā.

sn3.4:1.8 Kiñcāpi te evaṁ vadeyyuṁ:

sn3.4:1.9 “piyo no attā”ti, atha kho tesaṁ appiyo attā’.

sn3.4:1.10 Taṁ kissa hetu?

sn3.4:1.11 Yañhi appiyo appiyassa kareyya, taṁ te attanāva attano karonti;

sn3.4:1.12 tasmā tesaṁ appiyo attā.

sn3.4:1.13 Ye ca kho keci kāyena sucaritaṁ caranti, vācāya sucaritaṁ caranti, manasā sucaritaṁ caranti;

sn3.4:1.14 tesaṁ piyo attā.

sn3.4:1.15 Kiñcāpi te evaṁ vadeyyuṁ:

sn3.4:1.16 ‘appiyo no attā’ti; atha kho tesaṁ piyo attā.

sn3.4:1.17 Taṁ kissa hetu?

sn3.4:1.18 Yañhi piyo piyassa kareyya, taṁ te attanāva attano karonti;

sn3.4:1.19 tasmā tesaṁ piyo attā”ti.