Natthidinnasutta

sn24.5:1.1 Sāvatthinidānaṁ.

sn24.5:1.2 “Kismiṁ nu kho, bhikkhave, sati kiṁ upādāya, kiṁ abhinivissa evaṁ diṭṭhi uppajjati:

sn24.5:1.3 ‘natthi dinnaṁ, natthi yiṭṭhaṁ, natthi hutaṁ, natthi sukatadukkaṭānaṁ kammānaṁ phalaṁ vipāko; natthi ayaṁ loko, natthi paro loko, natthi mātā, natthi pitā, natthi sattā opapātikā; natthi loke samaṇabrāhmaṇā sammaggatā sammāpaṭipannā ye imañca lokaṁ parañca lokaṁ sayaṁ abhiññā sacchikatvā pavedenti.

sn24.5:1.4 Cātumahābhūtiko ayaṁ puriso yadā kālaṁ karoti pathavī pathavīkāyaṁ anupeti anupagacchati, āpo āpokāyaṁ anupeti anupagacchati, tejo tejokāyaṁ anupeti anupagacchati, vāyo vāyokāyaṁ anupeti anupagacchati.

sn24.5:1.5 Ākāsaṁ indriyāni saṅkamanti.

sn24.5:1.6 Āsandipañcamā purisā mataṁ ādāya gacchanti.

sn24.5:1.7 Yāva āḷāhanā padāni paññāyanti.

sn24.5:1.8 Kāpotakāni aṭṭhīni bhavanti.

sn24.5:1.9 Bhassantā āhutiyo.

sn24.5:1.10 Dattupaññattaṁ yadidaṁ dānaṁ.

sn24.5:1.11 Tesaṁ tucchaṁ musā vilāpo ye keci atthikavādaṁ vadanti.

sn24.5:1.12 Bāle ca paṇḍite ca kāyassa bhedā ucchijjanti vinassanti na honti paraṁ maraṇā’”ti?

sn24.5:1.13 “Bhagavaṁmūlakā no, bhante, dhammā …pe…