Mārasutta

sn23.11:1.1 Sāvatthinidānaṁ.

sn23.11:1.2 Ekamantaṁ nisinno kho āyasmā rādho bhagavantaṁ etadavoca:

sn23.11:1.3 “‘māro, māro’ti, bhante, vuccati.

sn23.11:1.4 Katamo nu kho, bhante, māro”ti?

sn23.11:1.5 “Rūpaṁ kho, rādha, māro, vedanā māro, saññā māro, saṅkhārā māro, viññāṇaṁ māro.

sn23.11:1.6 Evaṁ passaṁ, rādha, sutavā ariyasāvako rūpasmimpi nibbindati, vedanāyapi nibbindati, saññāyapi nibbindati, saṅkhāresupi nibbindati, viññāṇasmimpi nibbindati.

sn23.11:1.7 Nibbindaṁ virajjati; virāgā vimuccati. Vimuttasmiṁ vimuttamiti ñāṇaṁ hoti.

sn23.11:1.8 ‘Khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyā’ti pajānātī”ti.

sn23.11:1.9 Paṭhamaṁ.