Pālileyyasutta

sn22.81:5.1 Kathañca, bhikkhave, jānato kathaṁ passato anantarā āsavānaṁ khayo hoti?

sn22.81:5.2 Idha bhikkhave, assutavā puthujjano ariyānaṁ adassāvī ariyadhammassa akovido ariyadhamme avinīto, sappurisānaṁ adassāvī sappurisadhammassa akovido sappurisadhamme avinīto

sn22.81:5.3 rūpaṁ attato samanupassati.

sn22.81:5.4 Yā kho pana sā, bhikkhave, samanupassanā saṅkhāro so.

sn22.81:5.5 So pana saṅkhāro kiṁnidāno kiṁsamudayo kiṁjātiko kiṁpabhavo?

sn22.81:5.6 Avijjāsamphassajena, bhikkhave, vedayitena phuṭṭhassa assutavato puthujjanassa uppannā taṇhā;

sn22.81:5.7 tatojo so saṅkhāro.

sn22.81:5.8 Iti kho, bhikkhave, sopi saṅkhāro anicco saṅkhato paṭiccasamuppanno.

sn22.81:5.9 Sāpi taṇhā aniccā saṅkhatā paṭiccasamuppannā.

sn22.81:5.10 Sāpi vedanā, sopi phasso anicco saṅkhato paṭiccasamuppanno.

sn22.81:5.11 Sāpi avijjā aniccā saṅkhatā paṭiccasamuppannā.

sn22.81:5.12 Evampi kho, bhikkhave, jānato evaṁ passato anantarā āsavānaṁ khayo hoti.