Assādasutta

sn22.26:1.1 Sāvatthinidānaṁ.

sn22.26:1.2 “Pubbeva me, bhikkhave, sambodhā anabhisambuddhassa bodhisattasseva sato etadahosi:

sn22.26:1.3 ‘ko nu kho rūpassa assādo, ko ādīnavo, kiṁ nissaraṇaṁ?

sn22.26:1.4 Ko vedanāya assādo, ko ādīnavo, kiṁ nissaraṇaṁ?

sn22.26:1.5 Ko saññāya assādo, ko ādīnavo, kiṁ nissaraṇaṁ?

sn22.26:1.6 Ko saṅkhārānaṁ assādo, ko ādīnavo, kiṁ nissaraṇaṁ?

sn22.26:1.7 Ko viññāṇassa assādo, ko ādīnavo, kiṁ nissaraṇan’ti?

sn22.26:1.8 Tassa mayhaṁ, bhikkhave, etadahosi:

sn22.26:1.9 ‘yaṁ kho rūpaṁ paṭicca uppajjati sukhaṁ somanassaṁ, ayaṁ rūpassa assādo.

sn22.26:1.10 Yaṁ rūpaṁ aniccaṁ dukkhaṁ vipariṇāmadhammaṁ, ayaṁ rūpassa ādīnavo.

sn22.26:1.11 Yo rūpasmiṁ chandarāgavinayo chandarāgappahānaṁ, idaṁ rūpassa nissaraṇaṁ.

sn22.26:1.12 Yaṁ vedanaṁ paṭicca uppajjati sukhaṁ somanassaṁ, ayaṁ vedanāya assādo.

sn22.26:1.13 Yaṁ vedanā aniccā dukkhā vipariṇāmadhammā, ayaṁ vedanāya ādīnavo.

sn22.26:1.14 Yo vedanāya chandarāgavinayo chandarāgappahānaṁ, idaṁ vedanāya nissaraṇaṁ.

sn22.26:1.15 Yaṁ saññaṁ paṭicca uppajjati …pe…

sn22.26:1.16 yaṁ saṅkhāre paṭicca uppajjati sukhaṁ somanassaṁ, ayaṁ saṅkhārānaṁ assādo.

sn22.26:1.17 Yaṁ saṅkhārā aniccā dukkhā vipariṇāmadhammā, ayaṁ saṅkhārānaṁ ādīnavo.

sn22.26:1.18 Yo saṅkhāresu chandarāgavinayo chandarāgappahānaṁ, idaṁ saṅkhārānaṁ nissaraṇaṁ.

sn22.26:1.19 Yaṁ viññāṇaṁ paṭicca uppajjati sukhaṁ somanassaṁ, ayaṁ viññāṇassa assādo.

sn22.26:1.20 Yaṁ viññāṇaṁ aniccaṁ dukkhaṁ vipariṇāmadhammaṁ, ayaṁ viññāṇassa ādīnavo.

sn22.26:1.21 Yo viññāṇasmiṁ chandarāgavinayo chandarāgappahānaṁ, idaṁ viññāṇassa nissaraṇaṁ’.