Chandarāgasutta

sn22.25:1.1 Sāvatthinidānaṁ.

sn22.25:1.2 “Yo, bhikkhave, rūpasmiṁ chandarāgo taṁ pajahatha.

sn22.25:1.3 Evaṁ taṁ rūpaṁ pahīnaṁ bhavissati ucchinnamūlaṁ tālāvatthukataṁ anabhāvaṅkataṁ āyatiṁ anuppādadhammaṁ.

sn22.25:1.4 Yo vedanāya chandarāgo taṁ pajahatha.

sn22.25:1.5 Evaṁ sā vedanā pahīnā bhavissati ucchinnamūlā tālāvatthukatā anabhāvaṅkatā āyatiṁ anuppādadhammā.

sn22.25:1.6 Yo saññāya chandarāgo taṁ pajahatha.

sn22.25:1.7 Evaṁ sā saññā pahīnā bhavissati ucchinnamūlā tālāvatthukatā anabhāvaṅkatā āyatiṁ anuppādadhammā.

sn22.25:1.8 Yo saṅkhāresu chandarāgo taṁ pajahatha.

sn22.25:1.9 Evaṁ te saṅkhārā pahīnā bhavissanti ucchinnamūlā tālāvatthukatā anabhāvaṅkatā āyatiṁ anuppādadhammā.

sn22.25:1.10 Yo viññāṇasmiṁ chandarāgo taṁ pajahatha.

sn22.25:1.11 Evaṁ taṁ viññāṇaṁ pahīnaṁ bhavissati ucchinnamūlaṁ tālāvatthukataṁ anabhāvaṅkataṁ āyatiṁ anuppādadhamman”ti.

sn22.25:1.12 Catutthaṁ.