Vāsijaṭasutta

sn22.101:5.1 Seyyathāpi, bhikkhave, kukkuṭiyā aṇḍāni aṭṭha vā dasa vā dvādasa vā.

sn22.101:5.2 Tānassu kukkuṭiyā sammā adhisayitāni, sammā pariseditāni, sammā paribhāvitāni.

sn22.101:5.3 Kiñcāpi tassā kukkuṭiyā na evaṁ icchā uppajjeyya:

sn22.101:5.4 ‘aho vata me kukkuṭapotakā pādanakhasikhāya vā mukhatuṇḍakena vā aṇḍakosaṁ padāletvā sotthinā abhinibbhijjeyyun’ti,

sn22.101:5.5 atha kho bhabbāva te kukkuṭapotakā pādanakhasikhāya vā mukhatuṇḍakena vā aṇḍakosaṁ padāletvā sotthinā abhinibbhijjituṁ.

sn22.101:5.6 Taṁ kissa hetu?

sn22.101:5.7 Tathā hi pana, bhikkhave, kukkuṭiyā aṇḍāni aṭṭha vā dasa vā dvādasa vā;

sn22.101:5.8 tānassu kukkuṭiyā sammā adhisayitāni, sammā pariseditāni, sammā paribhāvitāni.

sn22.101:5.9 Evameva kho, bhikkhave, bhāvanānuyogaṁ anuyuttassa bhikkhuno viharato kiñcāpi na evaṁ icchā uppajjeyya:

sn22.101:5.10 ‘aho vata me anupādāya āsavehi cittaṁ vimucceyyā’ti, atha khvassa anupādāya āsavehi cittaṁ vimuccati.

sn22.101:5.11 Taṁ kissa hetu?

sn22.101:5.12 ‘Bhāvitattā’tissa vacanīyaṁ.

sn22.101:5.13 Kissa bhāvitattā?

sn22.101:5.14 Bhāvitattā catunnaṁ satipaṭṭhānānaṁ …pe… bhāvitattā ariyassa aṭṭhaṅgikassa maggassa.