Dutiyagaddulabaddhasutta

sn22.100:1.1 Sāvatthinidānaṁ.

sn22.100:1.2 “Anamataggoyaṁ, bhikkhave, saṁsāro.

sn22.100:1.3 Pubbā koṭi na paññāyati avijjānīvaraṇānaṁ sattānaṁ taṇhāsaṁyojanānaṁ sandhāvataṁ saṁsarataṁ.

sn22.100:1.4 Seyyathāpi, bhikkhave, sā gaddulabaddho daḷhe khīle vā thambhe vā upanibaddho. So gacchati cepi tameva khīlaṁ vā thambhaṁ vā upagacchati; tiṭṭhati cepi tameva khīlaṁ vā thambhaṁ vā upatiṭṭhati; nisīdati cepi tameva khīlaṁ vā thambhaṁ vā upanisīdati; nipajjati cepi tameva khīlaṁ vā thambhaṁ vā upanipajjati.

sn22.100:1.5 Evameva kho, bhikkhave, assutavā puthujjano rūpaṁ ‘etaṁ mama, esohamasmi, eso me attā’ti samanupassati.

sn22.100:1.6 Vedanaṁ …

sn22.100:1.7 saññaṁ …

sn22.100:1.8 saṅkhāre …

sn22.100:1.9 viññāṇaṁ ‘etaṁ mama, esohamasmi, eso me attā’ti samanupassati.

sn22.100:1.10 So gacchati cepi ime pañcupādānakkhandhe upagacchati;

sn22.100:1.11 tiṭṭhati cepi ime pañcupādānakkhandhe upatiṭṭhati;

sn22.100:1.12 nisīdati cepi ime pañcupādānakkhandhe upanisīdati;

sn22.100:1.13 nipajjati cepi ime pañcupādānakkhandhe upanipajjati.

sn22.100:1.14 Tasmātiha, bhikkhave, abhikkhaṇaṁ sakaṁ cittaṁ paccavekkhitabbaṁ:

sn22.100:1.15 ‘dīgharattamidaṁ cittaṁ saṅkiliṭṭhaṁ rāgena dosena mohenā’ti.

sn22.100:1.16 Cittasaṅkilesā, bhikkhave, sattā saṅkilissanti;

sn22.100:1.17 cittavodānā sattā visujjhanti.