Theranāmakasutta

sn21.10:2.1 Atha kho bhagavā aññataraṁ bhikkhuṁ āmantesi:

sn21.10:2.2 “ehi tvaṁ, bhikkhu, mama vacanena theraṁ bhikkhuṁ āmantehi:

sn21.10:2.3 ‘satthā taṁ, āvuso thera, āmantetī’”ti.

sn21.10:2.4 “Evaṁ, bhante”ti kho so bhikkhu bhagavato paṭissutvā yenāyasmā thero tenupasaṅkami; upasaṅkamitvā āyasmantaṁ theraṁ etadavoca:

sn21.10:2.5 “satthā taṁ, āvuso thera, āmantetī”ti.

sn21.10:2.6 “Evamāvuso”ti kho āyasmā thero tassa bhikkhuno paṭissutvā yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho āyasmantaṁ theraṁ bhagavā etadavoca:

sn21.10:2.7 “saccaṁ kira tvaṁ, thera, ekavihārī ekavihārassa ca vaṇṇavādī”ti?

sn21.10:2.8 “Evaṁ, bhante”.

sn21.10:2.9 “Yathā kathaṁ pana tvaṁ, thera, ekavihārī ekavihārassa ca vaṇṇavādī”ti?

sn21.10:2.10 “Idhāhaṁ, bhante, eko gāmaṁ piṇḍāya pavisāmi eko paṭikkamāmi eko raho nisīdāmi eko caṅkamaṁ adhiṭṭhāmi.

sn21.10:2.11 Evaṁ khvāhaṁ, bhante, ekavihārī ekavihārassa ca vaṇṇavādī”ti.