sn20.3:1.1 Sāvatthiyaṁ viharati.
BAGIAN 1
sn20.3:1.2 “Seyyathāpi, bhikkhave, yāni kānici kulāni bahutthikāni appapurisāni tāni suppadhaṁsiyāni honti corehi kumbhatthenakehi;
sn20.3:1.3 evameva kho, bhikkhave, yassa kassaci bhikkhuno mettācetovimutti abhāvitā abahulīkatā so suppadhaṁsiyo hoti amanussehi.
sn20.3:1.4 Seyyathāpi, bhikkhave, yāni kānici kulāni appitthikāni bahupurisāni tāni duppadhaṁsiyāni honti corehi kumbhatthenakehi;
sn20.3:1.5 evameva kho, bhikkhave, yassa kassaci bhikkhuno mettācetovimutti bhāvitā bahulīkatā so duppadhaṁsiyo hoti amanussehi.
sn20.3:1.6 Tasmātiha, bhikkhave, evaṁ sikkhitabbaṁ:
sn20.3:1.7 ‘mettā no cetovimutti bhāvitā bhavissati bahulīkatā yānīkatā vatthukatā anuṭṭhitā paricitā susamāraddhā’ti.
sn20.3:1.8 Evañhi vo, bhikkhave, sikkhitabban”ti.
sn20.3:1.9 Tatiyaṁ.