Aṭṭhisutta

sn19.1:1.1 Evaṁ me sutaṁ—

sn19.1:1.2 ekaṁ samayaṁ bhagavā rājagahe viharati veḷuvane kalandakanivāpe.

sn19.1:1.3 Tena kho pana samayena āyasmā ca lakkhaṇo āyasmā ca mahāmoggallāno gijjhakūṭe pabbate viharanti.

sn19.1:1.4 Atha kho āyasmā mahāmoggallāno pubbaṇhasamayaṁ nivāsetvā pattacīvaramādāya yenāyasmā lakkhaṇo tenupasaṅkami; upasaṅkamitvā āyasmantaṁ lakkhaṇaṁ etadavoca:

sn19.1:1.5 “āyāmāvuso lakkhaṇa, rājagahaṁ piṇḍāya pavisissāmā”ti.

sn19.1:1.6 “Evamāvuso”ti kho āyasmā lakkhaṇo āyasmato mahāmoggallānassa paccassosi.

sn19.1:1.7 Atha kho āyasmā mahāmoggallāno gijjhakūṭā pabbatā orohanto aññatarasmiṁ padese sitaṁ pātvākāsi.

sn19.1:1.8 Atha kho āyasmā lakkhaṇo āyasmantaṁ mahāmoggallānaṁ etadavoca:

sn19.1:1.9 “ko nu kho, āvuso moggallāna, hetu ko paccayo sitassa pātukammāyā”ti?

sn19.1:1.10 “Akālo kho, āvuso lakkhaṇa, etassa pañhassa.

sn19.1:1.11 Bhagavato maṁ santike etaṁ pañhaṁ pucchā”ti.