sn18.11:1.1 Evaṁ me sutaṁ—
BAGIAN 1
sn18.11:1.2 ekaṁ samayaṁ bhagavā sāvatthiyaṁ viharati.
sn18.11:1.3 Atha kho āyasmā rāhulo yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho āyasmantaṁ rāhulaṁ bhagavā etadavoca:
sn18.11:1.4 “Taṁ kiṁ maññasi, rāhula,
sn18.11:1.5 cakkhuṁ niccaṁ vā aniccaṁ vā”ti?
sn18.11:1.6 “Aniccaṁ, bhante”.
sn18.11:1.7 “Yaṁ panāniccaṁ dukkhaṁ vā taṁ sukhaṁ vā”ti?
sn18.11:1.8 “Dukkhaṁ, bhante”.
sn18.11:1.9 “Yaṁ panāniccaṁ dukkhaṁ vipariṇāmadhammaṁ, kallaṁ nu taṁ samanupassituṁ:
sn18.11:1.10 ‘etaṁ mama, esohamasmi, eso me attā’”ti?
sn18.11:1.11 “No hetaṁ, bhante”.
sn18.11:1.12 “Sotaṁ …pe…
sn18.11:1.13 ghānaṁ …
sn18.11:1.14 jivhā …
sn18.11:1.15 kāyo …
sn18.11:1.16 mano nicco vā anicco vā”ti?
sn18.11:1.17 “Anicco, bhante”.
sn18.11:1.18 “Yaṁ panāniccaṁ dukkhaṁ vā taṁ sukhaṁ vā”ti?
sn18.11:1.19 “Dukkhaṁ, bhante”.
sn18.11:1.20 “Yaṁ panāniccaṁ dukkhaṁ vipariṇāmadhammaṁ, kallaṁ nu taṁ samanupassituṁ:
sn18.11:1.21 ‘etaṁ mama, esohamasmi, eso me attā’”ti?
sn18.11:1.22 “No hetaṁ, bhante”.
sn18.11:1.23 “Evaṁ passaṁ, rāhula, sutavā ariyasāvako cakkhusmimpi nibbindati …pe… sotasmimpi nibbindati … ghānasmimpi nibbindati … jivhāyapi nibbindati … kāyasmimpi nibbindati … manasmimpi nibbindati;
sn18.11:1.24 nibbindaṁ virajjati; virāgā vimuccati; vimuttasmiṁ vimuttamiti ñāṇaṁ hoti.
sn18.11:1.25 ‘Khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyā’ti pajānātī”ti.
sn18.11:1.26 (Etena peyyālena dasa suttantā kātabbā.)
sn18.11:1.27 Paṭhamaṁ.