Ekadhītusutta

sn17.24:1.1 Sāvatthiyaṁ viharati.

sn17.24:1.2 “Dāruṇo, bhikkhave, lābhasakkārasiloko …pe…

sn17.24:1.3 saddhā bhikkhave upāsikā ekaṁ dhītaraṁ piyaṁ manāpaṁ evaṁ sammā āyācamānā āyāceyya:

sn17.24:1.4 ‘tādisā, ayye, bhavāhi yādisā khujjuttarā ca upāsikā veḷukaṇḍakiyā ca nandamātā’ti.

sn17.24:1.5 Esā, bhikkhave, tulā etaṁ pamāṇaṁ mama sāvikānaṁ upāsikānaṁ, yadidaṁ khujjuttarā ca upāsikā veḷukaṇḍakiyā ca nandamātā.

sn17.24:1.6 Sace kho tvaṁ, ayye, agārasmā anagāriyaṁ pabbajasi;

sn17.24:1.7 tādisā, ayye, bhavāhi yādisā khemā ca bhikkhunī uppalavaṇṇā cāti.

sn17.24:1.8 Esā, bhikkhave, tulā etaṁ pamāṇaṁ mama sāvikānaṁ bhikkhunīnaṁ, yadidaṁ khemā ca bhikkhunī uppalavaṇṇā ca.

sn17.24:1.9 Mā ca kho tvaṁ, ayye, sekhaṁ appattamānasaṁ lābhasakkārasiloko anupāpuṇātūti.

sn17.24:1.10 Tañce, bhikkhave, bhikkhuniṁ sekhaṁ appattamānasaṁ lābhasakkārasiloko anupāpuṇāti, so tassā hoti antarāyāya.

sn17.24:1.11 Evaṁ dāruṇo kho, bhikkhave, lābhasakkārasiloko …pe…

sn17.24:1.12 evañhi vo, bhikkhave, sikkhitabban”ti.

sn17.24:1.13 Catutthaṁ.