sn16.12:1.1 Ekaṁ samayaṁ āyasmā ca mahākassapo āyasmā ca sāriputto bārāṇasiyaṁ viharanti isipatane migadāye.
BAGIAN 1
sn16.12:1.2 Atha kho āyasmā sāriputto sāyanhasamayaṁ paṭisallānā vuṭṭhito yenāyasmā mahākassapo tenupasaṅkami; upasaṅkamitvā āyasmatā mahākassapena saddhiṁ sammodi.
sn16.12:1.3 Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho āyasmā sāriputto āyasmantaṁ mahākassapaṁ etadavoca:
sn16.12:1.4 “kiṁ nu kho, āvuso kassapa, hoti tathāgato paraṁ maraṇā”ti?
sn16.12:1.5 “Abyākataṁ kho etaṁ, āvuso, bhagavatā:
sn16.12:1.6 ‘hoti tathāgato paraṁ maraṇā’”ti.
sn16.12:1.7 “Kiṁ panāvuso, na hoti tathāgato paraṁ maraṇā”ti?
sn16.12:1.8 “Evampi kho, āvuso, abyākataṁ bhagavatā:
sn16.12:1.9 ‘na hoti tathāgato paraṁ maraṇā’”ti.
sn16.12:1.10 “Kiṁ nu kho, āvuso, hoti ca na ca hoti tathāgato paraṁ maraṇā”ti?
sn16.12:1.11 “Abyākataṁ kho etaṁ, āvuso, bhagavatā:
sn16.12:1.12 ‘hoti ca na ca hoti tathāgato paraṁ maraṇā’”ti.
sn16.12:1.13 “Kiṁ panāvuso, neva hoti, na na hoti tathāgato paraṁ maraṇā”ti?
sn16.12:1.14 “Evampi kho, āvuso, abyākataṁ bhagavatā:
sn16.12:1.15 ‘neva hoti na na hoti tathāgato paraṁ maraṇā’”ti.
sn16.12:1.16 “Kasmā cetaṁ, āvuso, abyākataṁ bhagavatā”ti?
sn16.12:1.17 “Na hetaṁ, āvuso, atthasaṁhitaṁ nādibrahmacariyakaṁ na nibbidāya na virāgāya na nirodhāya na upasamāya na abhiññāya na sambodhāya na nibbānāya saṁvattati.
sn16.12:1.18 Tasmā taṁ abyākataṁ bhagavatā”ti.