sn15.20:2.1 “Anamataggoyaṁ, bhikkhave, saṁsāro.
BAGIAN 2
sn15.20:2.2 Pubbā koṭi na paññāyati avijjānīvaraṇānaṁ sattānaṁ taṇhāsaṁyojanānaṁ sandhāvataṁ saṁsarataṁ.
sn15.20:2.3 Bhūtapubbaṁ, bhikkhave, imassa vepullassa pabbatassa ‘pācīnavaṁso’tveva samaññā udapādi.
sn15.20:2.4 Tena kho pana, bhikkhave, samayena manussānaṁ ‘tivarā’tveva samaññā udapādi.
sn15.20:2.5 Tivarānaṁ, bhikkhave, manussānaṁ cattārīsa vassasahassāni āyuppamāṇaṁ ahosi.
sn15.20:2.6 Tivarā, bhikkhave, manussā pācīnavaṁsaṁ pabbataṁ catūhena ārohanti, catūhena orohanti.
sn15.20:2.7 Tena kho pana, bhikkhave, samayena kakusandho bhagavā arahaṁ sammāsambuddho loke uppanno hoti.
sn15.20:2.8 Kakusandhassa, bhikkhave, bhagavato arahato sammāsambuddhassa vidhurasañjīvaṁ nāma sāvakayugaṁ ahosi aggaṁ bhaddayugaṁ.
sn15.20:2.9 Passatha, bhikkhave, sā cevimassa pabbatassa samaññā antarahitā, te ca manussā kālaṅkatā, so ca bhagavā parinibbuto.
sn15.20:2.10 Evaṁ aniccā, bhikkhave, saṅkhārā;
sn15.20:2.11 evaṁ addhuvā, bhikkhave, saṅkhārā;
sn15.20:2.12 evaṁ anassāsikā, bhikkhave, saṅkhārā.
sn15.20:2.13 Yāvañcidaṁ, bhikkhave, alameva sabbasaṅkhāresu nibbindituṁ, alaṁ virajjituṁ, alaṁ vimuccituṁ.