Tiṇakaṭṭhasutta

sn15.1:1.1 Evaṁ me sutaṁ—

sn15.1:1.2 ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.

sn15.1:1.3 Tatra kho bhagavā bhikkhū āmantesi:

sn15.1:1.4 “bhikkhavo”ti.

sn15.1:1.5 “Bhadante”ti te bhikkhū bhagavato paccassosuṁ.

sn15.1:1.6 Bhagavā etadavoca:

sn15.1:1.7 “Anamataggoyaṁ, bhikkhave, saṁsāro.

sn15.1:1.8 Pubbā koṭi na paññāyati avijjānīvaraṇānaṁ sattānaṁ taṇhāsaṁyojanānaṁ sandhāvataṁ saṁsarataṁ.

sn15.1:1.9 Seyyathāpi, bhikkhave, puriso yaṁ imasmiṁ jambudīpe tiṇakaṭṭhasākhāpalāsaṁ taṁ chetvā ekajjhaṁ saṁharitvā caturaṅgulaṁ caturaṅgulaṁ ghaṭikaṁ katvā nikkhipeyya:

sn15.1:1.10 ‘ayaṁ me mātā, tassā me mātu ayaṁ mātā’ti, apariyādinnāva, bhikkhave, tassa purisassa mātumātaro assu, atha imasmiṁ jambudīpe tiṇakaṭṭhasākhāpalāsaṁ parikkhayaṁ pariyādānaṁ gaccheyya.

sn15.1:1.11 Taṁ kissa hetu?

sn15.1:1.12 Anamataggoyaṁ, bhikkhave, saṁsāro.

sn15.1:1.13 Pubbā koṭi na paññāyati avijjānīvaraṇānaṁ sattānaṁ taṇhāsaṁyojanānaṁ sandhāvataṁ saṁsarataṁ.

sn15.1:1.14 Evaṁ dīgharattaṁ vo, bhikkhave, dukkhaṁ paccanubhūtaṁ tibbaṁ paccanubhūtaṁ byasanaṁ paccanubhūtaṁ, kaṭasī vaḍḍhitā.

sn15.1:1.15 Yāvañcidaṁ, bhikkhave, alameva sabbasaṅkhāresu nibbindituṁ alaṁ virajjituṁ alaṁ vimuccitun”ti.

sn15.1:1.16 Paṭhamaṁ.