Kusītamūlakasutta

sn14.22:1.1 Sāvatthiyaṁ viharati.

sn14.22:1.2 “Dhātusova, bhikkhave, sattā saṁsandanti samenti.

sn14.22:1.3 Kusītā kusītehi saddhiṁ saṁsandanti samenti;

sn14.22:1.4 muṭṭhassatino muṭṭhassatīhi saddhiṁ saṁsandanti samenti;

sn14.22:1.5 duppaññā duppaññehi saddhiṁ saṁsandanti samenti;

sn14.22:1.6 āraddhavīriyā āraddhavīriyehi saddhiṁ saṁsandanti samenti;

sn14.22:1.7 upaṭṭhitassatino upaṭṭhitassatīhi saddhiṁ saṁsandanti samenti; paññavanto paññavantehi saddhiṁ saṁsandanti samentī”ti …pe….

sn14.22:1.8 Dvādasamaṁ.

sn14.22:1.9 (Sabbattha atītānāgatapaccuppannaṁ kātabbaṁ.)

sn14.22:1.10 Dutiyo vaggo.