Susimaparibbājakasutta

sn12.70:2.1 Tena kho pana samayena susimo paribbājako rājagahe paṭivasati mahatiyā paribbājakaparisāya saddhiṁ.

sn12.70:2.2 Atha kho susimassa paribbājakassa parisā susimaṁ paribbājakaṁ etadavocuṁ:

sn12.70:2.3 “ehi tvaṁ, āvuso susima, samaṇe gotame brahmacariyaṁ cara.

sn12.70:2.4 Tvaṁ dhammaṁ pariyāpuṇitvā amhe vāceyyāsi.

sn12.70:2.5 Taṁ mayaṁ dhammaṁ pariyāpuṇitvā gihīnaṁ bhāsissāma.

sn12.70:2.6 Evaṁ mayampi sakkatā bhavissāma garukatā mānitā pūjitā apacitā lābhino cīvarapiṇḍapātasenāsanagilānappaccayabhesajjaparikkhārānan”ti.

sn12.70:2.7 “Evamāvuso”ti kho susimo paribbājako sakāya parisāya paṭissuṇitvā yenāyasmā ānando tenupasaṅkami; upasaṅkamitvā āyasmatā ānandena saddhiṁ sammodi.

sn12.70:2.8 Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho susimo paribbājako āyasmantaṁ ānandaṁ etadavoca:

sn12.70:2.9 “icchāmahaṁ, āvuso ānanda, imasmiṁ dhammavinaye brahmacariyaṁ caritun”ti.