Dutiyaassutavāsutta

sn12.62:1.1 Sāvatthiyaṁ viharati.

sn12.62:1.2 “Assutavā, bhikkhave, puthujjano imasmiṁ cātumahābhūtikasmiṁ kāyasmiṁ nibbindeyyapi virajjeyyapi vimucceyyapi.

sn12.62:1.3 Taṁ kissa hetu?

sn12.62:1.4 Dissati, bhikkhave, imassa cātumahābhūtikassa kāyassa ācayopi apacayopi ādānampi nikkhepanampi.

sn12.62:1.5 Tasmā tatrāssutavā puthujjano nibbindeyyapi virajjeyyapi vimucceyyapi.

sn12.62:1.6 Yañca kho etaṁ, bhikkhave, vuccati cittaṁ itipi, mano itipi, viññāṇaṁ itipi, tatrāssutavā puthujjano nālaṁ nibbindituṁ nālaṁ virajjituṁ nālaṁ vimuccituṁ.

sn12.62:1.7 Taṁ kissa hetu?

sn12.62:1.8 Dīgharattañhetaṁ, bhikkhave, assutavato puthujjanassa ajjhositaṁ mamāyitaṁ parāmaṭṭhaṁ:

sn12.62:1.9 ‘etaṁ mama, esohamasmi, eso me attā’ti.

sn12.62:1.10 Tasmā tatrāssutavā puthujjano nālaṁ nibbindituṁ nālaṁ virajjituṁ nālaṁ vimuccituṁ.