Parivīmaṁsanasutta

sn12.51:3.1 “Idha, bhikkhave, bhikkhu parivīmaṁsamāno parivīmaṁsati:

sn12.51:3.2 ‘yaṁ kho idaṁ anekavidhaṁ nānappakārakaṁ dukkhaṁ loke uppajjati jarāmaraṇaṁ;

sn12.51:3.3 idaṁ nu kho dukkhaṁ kiṁnidānaṁ kiṁsamudayaṁ kiṁjātikaṁ kiṁpabhavaṁ?

sn12.51:3.4 Kismiṁ sati jarāmaraṇaṁ hoti, kismiṁ asati jarāmaraṇaṁ na hotī’ti?

sn12.51:3.5 So parivīmaṁsamāno evaṁ pajānāti:

sn12.51:3.6 ‘yaṁ kho idaṁ anekavidhaṁ nānappakārakaṁ dukkhaṁ loke uppajjati jarāmaraṇaṁ, idaṁ kho dukkhaṁ jātinidānaṁ jātisamudayaṁ jātijātikaṁ jātippabhavaṁ.

sn12.51:3.7 Jātiyā sati jarāmaraṇaṁ hoti, jātiyā asati jarāmaraṇaṁ na hotī’ti.