sn12.21:1.1 Sāvatthiyaṁ viharati.
BAGIAN 1
sn12.21:1.2 “Dasabalasamannāgato, bhikkhave, tathāgato catūhi ca vesārajjehi samannāgato āsabhaṁ ṭhānaṁ paṭijānāti, parisāsu sīhanādaṁ nadati, brahmacakkaṁ pavatteti—
sn12.21:1.3 iti rūpaṁ iti rūpassa samudayo iti rūpassa atthaṅgamo,
sn12.21:1.4 iti vedanā iti vedanāya samudayo iti vedanāya atthaṅgamo,
sn12.21:1.5 iti saññā iti saññāya samudayo iti saññāya atthaṅgamo,
sn12.21:1.6 iti saṅkhārā iti saṅkhārānaṁ samudayo iti saṅkhārānaṁ atthaṅgamo,
sn12.21:1.7 iti viññāṇaṁ iti viññāṇassa samudayo iti viññāṇassa atthaṅgamo.
sn12.21:1.8 Iti imasmiṁ sati idaṁ hoti, imassuppādā idaṁ uppajjati.
sn12.21:1.9 Imasmiṁ asati idaṁ na hoti, imassa nirodhā idaṁ nirujjhati.
sn12.21:1.10 Yadidaṁ avijjāpaccayā saṅkhārā;
sn12.21:1.11 saṅkhārapaccayā viññāṇaṁ …pe…
sn12.21:1.12 evametassa kevalassa dukkhakkhandhassa samudayo hoti.
sn12.21:1.13 Avijjāya tveva asesavirāganirodhā saṅkhāranirodho;
sn12.21:1.14 saṅkhāranirodhā viññāṇanirodho …pe…
sn12.21:1.15 evametassa kevalassa dukkhakkhandhassa nirodho hotī”ti.
sn12.21:1.16 Paṭhamaṁ.