Assalāyanasutta

mn93:18.1 Atha kho bhagavā assalāyanaṁ māṇavaṁ tuṇhībhūtaṁ maṅkubhūtaṁ pattakkhandhaṁ adhomukhaṁ pajjhāyantaṁ appaṭibhānaṁ viditvā assalāyanaṁ māṇavaṁ etadavoca:

mn93:18.2 “bhūtapubbaṁ, assalāyana, sattannaṁ brāhmaṇisīnaṁ araññāyatane paṇṇakuṭīsu sammantānaṁ evarūpaṁ pāpakaṁ diṭṭhigataṁ uppannaṁ hoti:

mn93:18.3 ‘brāhmaṇova seṭṭho vaṇṇo, hīno añño vaṇṇo …

mn93:18.4 pe…

mn93:18.5 brahmadāyādā’ti.

mn93:18.6 Assosi kho, assalāyana, asito devalo isi:

mn93:18.7 ‘sattannaṁ kira brāhmaṇisīnaṁ araññāyatane paṇṇakuṭīsu sammantānaṁ evarūpaṁ pāpakaṁ diṭṭhigataṁ uppannaṁ—

mn93:18.8 brāhmaṇova seṭṭho vaṇṇo …pe…

mn93:18.9 brahmadāyādā’ti.

mn93:18.10 Atha kho, assalāyana, asito devalo isi kesamassuṁ kappetvā mañjiṭṭhavaṇṇāni dussāni nivāsetvā paṭaliyo upāhanā āruhitvā jātarūpamayaṁ daṇḍaṁ gahetvā sattannaṁ brāhmaṇisīnaṁ patthaṇḍile pāturahosi.

mn93:18.11 Atha kho, assalāyana, asito devalo isi sattannaṁ brāhmaṇisīnaṁ patthaṇḍile caṅkamamāno evamāha:

mn93:18.12 ‘handa ko nu kho ime bhavanto brāhmaṇisayo gatā;

mn93:18.13 handa ko nu kho ime bhavanto brāhmaṇisayo gatā’ti?

mn93:18.14 Atha kho, assalāyana, sattannaṁ brāhmaṇisīnaṁ etadahosi:

mn93:18.15 ‘ko nāyaṁ gāmaṇḍalarūpo viya sattannaṁ brāhmaṇisīnaṁ patthaṇḍile caṅkamamāno evamāha:

mn93:18.16 “handa ko nu kho ime bhavanto brāhmaṇisayo gatā;

mn93:18.17 handa ko nu kho ime bhavanto brāhmaṇisayo gatāti?

mn93:18.18 Handa naṁ abhisapāmā”’ti.

mn93:18.19 Atha kho, assalāyana, satta brāhmaṇisayo asitaṁ devalaṁ isiṁ abhisapiṁsu:

mn93:18.20 ‘bhasmā, vasala, hohi;

mn93:18.21 bhasmā, vasala, hohī’ti.

mn93:18.22 Yathā yathā kho, assalāyana, satta brāhmaṇisayo asitaṁ devalaṁ isiṁ abhisapiṁsu tathā tathā asito devalo isi abhirūpataro ceva hoti dassanīyataro ca pāsādikataro ca.

mn93:18.23 Atha kho, assalāyana, sattannaṁ brāhmaṇisīnaṁ etadahosi:

mn93:18.24 ‘moghaṁ vata no tapo, aphalaṁ brahmacariyaṁ.

mn93:18.25 Mayañhi pubbe yaṁ abhisapāma—

mn93:18.26 bhasmā, vasala, hohi;

mn93:18.27 bhasmā, vasala, hohīti bhasmāva bhavati ekacco.

mn93:18.28 Imaṁ pana mayaṁ yathā yathā abhisapāma tathā tathā abhirūpataro ceva hoti dassanīyataro ca pāsādikataro cā’ti.

mn93:18.29 ‘Na bhavantānaṁ moghaṁ tapo, nāphalaṁ brahmacariyaṁ.

mn93:18.30 Iṅgha bhavanto, yo mayi manopadoso taṁ pajahathā’ti.

mn93:18.31 ‘Yo bhavati manopadoso taṁ pajahāma.

mn93:18.32 Ko nu bhavaṁ hotī’ti?

mn93:18.33 ‘Suto nu bhavataṁ—

mn93:18.34 asito devalo isī’ti?

mn93:18.35 ‘Evaṁ, bho’.

mn93:18.36 ‘So khvāhaṁ, bho, homī’ti.

mn93:18.37 Atha kho, assalāyana, satta brāhmaṇisayo asitaṁ devalaṁ isiṁ abhivādetuṁ upakkamiṁsu.

mn93:18.38 Atha kho, assalāyana, asito devalo isi satta brāhmaṇisayo etadavoca:

mn93:18.39 ‘sutaṁ metaṁ, bho, sattannaṁ kira brāhmaṇisīnaṁ araññāyatane paṇṇakuṭīsu sammantānaṁ evarūpaṁ pāpakaṁ diṭṭhigataṁ uppannaṁ—

mn93:18.40 brāhmaṇova seṭṭho vaṇṇo, hīno añño vaṇṇo;

mn93:18.41 brāhmaṇova sukko vaṇṇo, kaṇho añño vaṇṇo;

mn93:18.42 brāhmaṇāva sujjhanti, no abrāhmaṇā;

mn93:18.43 brāhmaṇāva brahmuno puttā orasā mukhato jātā brahmajā brahmanimmitā brahmadāyādā’ti.

mn93:18.44 ‘Evaṁ, bho’.

mn93:18.45 ‘Jānanti pana bhonto—

mn93:18.46 yā janikā mātā brāhmaṇaṁyeva agamāsi, no abrāhmaṇan’ti?

mn93:18.47 ‘No hidaṁ, bho’.

mn93:18.48 ‘Jānanti pana bhonto—

mn93:18.49 yā janikāmātu mātā yāva sattamā mātumātāmahayugā brāhmaṇaṁyeva agamāsi, no abrāhmaṇan’ti?

mn93:18.50 ‘No hidaṁ, bho’.

mn93:18.51 ‘Jānanti pana bhonto—

mn93:18.52 yo janako pitā brāhmaṇiṁyeva agamāsi, no abrāhmaṇin’ti?

mn93:18.53 ‘No hidaṁ, bho’.

mn93:18.54 ‘Jānanti pana bhonto—

mn93:18.55 yo janakapitu pitā yāva sattamā pitupitāmahayugā brāhmaṇiṁyeva agamāsi, no abrāhmaṇin’ti?

mn93:18.56 ‘No hidaṁ, bho’.

mn93:18.57 ‘Jānanti pana bhonto—

mn93:18.58 yathā gabbhassa avakkanti hotī’ti?

mn93:18.59 ‘Jānāma mayaṁ, bho—

mn93:18.60 yathā gabbhassa avakkanti hoti.

mn93:18.61 Idha mātāpitaro ca sannipatitā honti, mātā ca utunī hoti, gandhabbo ca paccupaṭṭhito hoti; evaṁ tiṇṇaṁ sannipātā gabbhassa avakkanti hotī’ti.

mn93:18.62 ‘Jānanti pana bhonto—

mn93:18.63 taggha, so gandhabbo khattiyo vā brāhmaṇo vā vesso vā suddo vā’ti?

mn93:18.64 ‘Na mayaṁ, bho, jānāma—

mn93:18.65 taggha so gandhabbo khattiyo vā brāhmaṇo vā vesso vā suddo vā’ti.

mn93:18.66 ‘Evaṁ sante, bho, jānātha—

mn93:18.67 ke tumhe hothā’ti?

mn93:18.68 ‘Evaṁ sante, bho, na mayaṁ jānāma—

mn93:18.69 ke mayaṁ homā’ti.

mn93:18.70 Te hi nāma, assalāyana, satta brāhmaṇisayo asitena devalena isinā sake jātivāde samanuyuñjīyamānā samanuggāhīyamānā samanubhāsīyamānā na sampāyissanti;

mn93:18.71 kiṁ pana tvaṁ etarahi mayā sakasmiṁ jātivāde samanuyuñjīyamāno samanuggāhīyamāno samanubhāsīyamāno sampāyissasi, yesaṁ tvaṁ sācariyako na puṇṇo dabbigāho”ti.