Kakacūpamasutta

mn21:9.1 Bhūtapubbaṁ, bhikkhave, imissāyeva sāvatthiyā vedehikā nāma gahapatānī ahosi.

mn21:9.2 Vedehikāya, bhikkhave, gahapatāniyā evaṁ kalyāṇo kittisaddo abbhuggato:

mn21:9.3 ‘soratā vedehikā gahapatānī, nivātā vedehikā gahapatānī, upasantā vedehikā gahapatānī’ti.

mn21:9.4 Vedehikāya kho pana, bhikkhave, gahapatāniyā kāḷī nāma dāsī ahosi dakkhā analasā susaṁvihitakammantā.

mn21:9.5 Atha kho, bhikkhave, kāḷiyā dāsiyā etadahosi:

mn21:9.6 ‘mayhaṁ kho ayyāya evaṁ kalyāṇo kittisaddo abbhuggato:

mn21:9.7 “soratā vedehikā gahapatānī, nivātā vedehikā gahapatānī, upasantā vedehikā gahapatānī”ti.

mn21:9.8 Kiṁ nu kho me ayyā santaṁyeva nu kho ajjhattaṁ kopaṁ na pātukaroti udāhu asantaṁ

mn21:9.9 udāhu mayhamevete kammantā susaṁvihitā yena me ayyā santaṁyeva ajjhattaṁ kopaṁ na pātukaroti, no asantaṁ?

mn21:9.10 Yannūnāhaṁ ayyaṁ vīmaṁseyyan’ti.

mn21:9.11 Atha kho, bhikkhave, kāḷī dāsī divā uṭṭhāsi.

mn21:9.12 Atha kho, bhikkhave, vedehikā gahapatānī kāḷiṁ dāsiṁ etadavoca:

mn21:9.13 ‘he je kāḷī’ti.

mn21:9.14 ‘Kiṁ, ayye’ti?

mn21:9.15 ‘Kiṁ, je, divā uṭṭhāsī’ti?

mn21:9.16 ‘Na khvayye, kiñcī’ti.

mn21:9.17 ‘No vata re kiñci, pāpi dāsi, divā uṭṭhāsī’ti kupitā anattamanā bhākuṭiṁ akāsi.

mn21:9.18 Atha kho, bhikkhave, kāḷiyā dāsiyā etadahosi:

mn21:9.19 ‘santaṁyeva kho me ayyā ajjhattaṁ kopaṁ na pātukaroti, no asantaṁ;

mn21:9.20 mayhamevete kammantā susaṁvihitā, yena me ayyā santaṁyeva ajjhattaṁ kopaṁ na pātukaroti, no asantaṁ.

mn21:9.21 Yannūnāhaṁ bhiyyoso mattāya ayyaṁ vīmaṁseyyan’ti.

mn21:9.22 Atha kho, bhikkhave, kāḷī dāsī divātaraṁyeva uṭṭhāsi.

mn21:9.23 Atha kho, bhikkhave, vedehikā gahapatānī kāḷiṁ dāsiṁ etadavoca:

mn21:9.24 ‘he je kāḷī’ti.

mn21:9.25 ‘Kiṁ, ayye’ti?

mn21:9.26 ‘Kiṁ, je, divātaraṁ uṭṭhāsī’ti?

mn21:9.27 ‘Na khvayye, kiñcī’ti.

mn21:9.28 ‘No vata re kiñci, pāpi dāsi, divātaraṁ uṭṭhāsī’ti kupitā anattamanā anattamanavācaṁ nicchāresi.

mn21:9.29 Atha kho, bhikkhave, kāḷiyā dāsiyā etadahosi:

mn21:9.30 ‘santaṁyeva kho me ayyā ajjhattaṁ kopaṁ na pātukaroti, no asantaṁ.

mn21:9.31 Mayhamevete kammantā susaṁvihitā, yena me ayyā santaṁyeva ajjhattaṁ kopaṁ na pātukaroti, no asantaṁ.

mn21:9.32 Yannūnāhaṁ bhiyyoso mattāya ayyaṁ vīmaṁseyyan’ti.

mn21:9.33 Atha kho, bhikkhave, kāḷī dāsī divātaraṁyeva uṭṭhāsi.

mn21:9.34 Atha kho, bhikkhave, vedehikā gahapatānī kāḷiṁ dāsiṁ etadavoca:

mn21:9.35 ‘he je kāḷī’ti.

mn21:9.36 ‘Kiṁ, ayye’ti?

mn21:9.37 ‘Kiṁ, je, divā uṭṭhāsī’ti?

mn21:9.38 ‘Na khvayye, kiñcī’ti.

mn21:9.39 ‘No vata re kiñci, pāpi dāsi, divā uṭṭhāsī’ti kupitā anattamanā aggaḷasūciṁ gahetvā sīse pahāraṁ adāsi, sīsaṁ vobhindi.

mn21:9.40 Atha kho, bhikkhave, kāḷī dāsī bhinnena sīsena lohitena galantena paṭivissakānaṁ ujjhāpesi:

mn21:9.41 ‘passathayye, soratāya kammaṁ;

mn21:9.42 passathayye, nivātāya kammaṁ, passathayye, upasantāya kammaṁ.

mn21:9.43 Kathañhi nāma ekadāsikāya divā uṭṭhāsīti kupitā anattamanā aggaḷasūciṁ gahetvā sīse pahāraṁ dassati, sīsaṁ vobhindissatī’ti.

mn21:9.44 Atha kho, bhikkhave, vedehikāya gahapatāniyā aparena samayena evaṁ pāpako kittisaddo abbhuggacchi:

mn21:9.45 ‘caṇḍī vedehikā gahapatānī, anivātā vedehikā gahapatānī, anupasantā vedehikā gahapatānī’ti.