Gaṇakamoggallānasutta

mn107:14.1 “Tena hi, brāhmaṇa, taṁyevettha paṭipucchissāmi. Yathā te khameyya tathā naṁ byākareyyāsi.

mn107:14.2 Taṁ kiṁ maññasi, brāhmaṇa,

mn107:14.3 kusalo tvaṁ rājagahagāmissa maggassā”ti?

mn107:14.4 “Evaṁ, bho, kusalo ahaṁ rājagahagāmissa maggassā”ti.

mn107:14.5 “Taṁ kiṁ maññasi, brāhmaṇa,

mn107:14.6 idha puriso āgaccheyya rājagahaṁ gantukāmo.

mn107:14.7 So taṁ upasaṅkamitvā evaṁ vadeyya:

mn107:14.8 ‘icchāmahaṁ, bhante, rājagahaṁ gantuṁ;

mn107:14.9 tassa me rājagahassa maggaṁ upadisā’ti.

mn107:14.10 Tamenaṁ tvaṁ evaṁ vadeyyāsi:

mn107:14.11 ‘ehambho purisa, ayaṁ maggo rājagahaṁ gacchati.

mn107:14.12 Tena muhuttaṁ gaccha, tena muhuttaṁ gantvā dakkhissasi amukaṁ nāma gāmaṁ, tena muhuttaṁ gaccha, tena muhuttaṁ gantvā dakkhissasi amukaṁ nāma nigamaṁ;

mn107:14.13 tena muhuttaṁ gaccha, tena muhuttaṁ gantvā dakkhissasi rājagahassa ārāmarāmaṇeyyakaṁ vanarāmaṇeyyakaṁ bhūmirāmaṇeyyakaṁ pokkharaṇīrāmaṇeyyakan’ti.

mn107:14.14 So tayā evaṁ ovadīyamāno evaṁ anusāsīyamāno ummaggaṁ gahetvā pacchāmukho gaccheyya.

mn107:14.15 Atha dutiyo puriso āgaccheyya rājagahaṁ gantukāmo.

mn107:14.16 So taṁ upasaṅkamitvā evaṁ vadeyya:

mn107:14.17 ‘icchāmahaṁ, bhante, rājagahaṁ gantuṁ;

mn107:14.18 tassa me rājagahassa maggaṁ upadisā’ti.

mn107:14.19 Tamenaṁ tvaṁ evaṁ vadeyyāsi:

mn107:14.20 ‘ehambho purisa, ayaṁ maggo rājagahaṁ gacchati.

mn107:14.21 Tena muhuttaṁ gaccha, tena muhuttaṁ gantvā dakkhissasi amukaṁ nāma gāmaṁ;

mn107:14.22 tena muhuttaṁ gaccha, tena muhuttaṁ gantvā dakkhissasi amukaṁ nāma nigamaṁ;

mn107:14.23 tena muhuttaṁ gaccha, tena muhuttaṁ gantvā dakkhissasi rājagahassa ārāmarāmaṇeyyakaṁ vanarāmaṇeyyakaṁ bhūmirāmaṇeyyakaṁ pokkharaṇīrāmaṇeyyakan’ti.

mn107:14.24 So tayā evaṁ ovadīyamāno evaṁ anusāsīyamāno sotthinā rājagahaṁ gaccheyya.

mn107:14.25 Ko nu kho, brāhmaṇa, hetu ko paccayo yaṁ tiṭṭhateva rājagahaṁ, tiṭṭhati rājagahagāmī maggo, tiṭṭhasi tvaṁ samādapetā;

mn107:14.26 atha ca pana tayā evaṁ ovadīyamāno evaṁ anusāsīyamāno eko puriso ummaggaṁ gahetvā pacchāmukho gaccheyya, eko sotthinā rājagahaṁ gaccheyyā”ti?

mn107:14.27 “Ettha kyāhaṁ, bho gotama, karomi?

mn107:14.28 Maggakkhāyīhaṁ, bho gotamā”ti.

mn107:14.29 “Evameva kho, brāhmaṇa, tiṭṭhateva nibbānaṁ, tiṭṭhati nibbānagāmī maggo, tiṭṭhāmahaṁ samādapetā;

mn107:14.30 atha ca pana mama sāvakā mayā evaṁ ovadīyamānā evaṁ anusāsīyamānā appekacce accantaṁ niṭṭhaṁ nibbānaṁ ārādhenti, ekacce nārādhenti.

mn107:14.31 Ettha kyāhaṁ, brāhmaṇa, karomi?

mn107:14.32 Maggakkhāyīhaṁ, brāhmaṇa, tathāgato”ti.