3.8. Satipaṭṭhānakathā

ps3.8:2.1 Kathaṁ <b>kāye kāyānupassī viharati?</b>

ps3.8:2.2 Idhekacco pathavīkāyaṁ aniccato anupassati, no niccato;

ps3.8:2.3 dukkhato anupassati, no sukhato;

ps3.8:2.4 anattato anupassati, no attato;

ps3.8:2.5 nibbindati, no nandati;

ps3.8:2.6 virajjati, no rajjati;

ps3.8:2.7 nirodheti, no samudeti, paṭinissajjati, no ādiyati.

ps3.8:2.8 Aniccato anupassanto niccasaññaṁ pajahati, dukkhato anupassanto sukhasaññaṁ pajahati, anattato anupassanto attasaññaṁ pajahati, nibbindanto nandiṁ pajahati, virajjanto rāgaṁ pajahati, nirodhento samudayaṁ pajahati, paṭinissajjanto ādānaṁ pajahati.

ps3.8:2.9 Imehi sattahi ākārehi kāyaṁ anupassati.

ps3.8:2.10 Kāyo upaṭṭhānaṁ, no sati.

ps3.8:2.11 Sati upaṭṭhānañceva sati ca.

ps3.8:2.12 Tāya satiyā tena ñāṇena taṁ kāyaṁ anupassati.

ps3.8:2.13 Tena vuccati—

ps3.8:2.14 “kāye kāyānupassanāsatipaṭṭhānā”.