3.8. Satipaṭṭhānakathā

ps3.8:13.1 Kathaṁ <b>dhammesu dhammānupassī viharati?</b>

ps3.8:13.2 Idhekacco ṭhapetvā kāyaṁ ṭhapetvā vedanaṁ ṭhapetvā cittaṁ tadavasese dhamme aniccato anupassati, no niccato;

ps3.8:13.3 dukkhato anupassati, no sukhato;

ps3.8:13.4 anattato anupassati, no attato;

ps3.8:13.5 nibbindati, no nandati;

ps3.8:13.6 virajjati, no rajjati;

ps3.8:13.7 nirodheti, no samudeti;

ps3.8:13.8 paṭinissajjati, no ādiyati.

ps3.8:13.9 Aniccato anupassanto niccasaññaṁ pajahati, dukkhato anupassanto sukhasaññaṁ pajahati, anattato anupassanto attasaññaṁ pajahati, nibbindanto nandiṁ pajahati, virajjanto rāgaṁ pajahati, nirodhento samudayaṁ pajahati, paṭinissajjanto ādānaṁ pajahati.

ps3.8:13.10 Imehi sattahi ākārehi te dhamme anupassati.

ps3.8:13.11 Dhammā upaṭṭhānaṁ, no sati.

ps3.8:13.12 Sati upaṭṭhānañceva sati ca.

ps3.8:13.13 Tāya satiyā tena ñāṇena te dhamme anupassati.

ps3.8:13.14 Tena vuccati—

ps3.8:13.15 “dhammesu dhammānupassanāsatipaṭṭhānā”.