3.1. Mahāpaññākathā

ps3.1:9.1 Rūpe aniccānupassanā bhāvitā bahulīkatā javanapaññaṁ paripūreti.

ps3.1:9.2 Atītānāgatapaccuppanne rūpe aniccānupassanā bhāvitā bahulīkatā javanapaññaṁ paripūreti.

ps3.1:9.3 Rūpe dukkhānupassanā bhāvitā bahulīkatā nibbedhikapaññaṁ paripūreti.

ps3.1:9.4 Atītānāgatapaccuppanne rūpe dukkhānupassanā bhāvitā bahulīkatā javanapaññaṁ paripūreti.

ps3.1:9.5 Rūpe anattānupassanā bhāvitā bahulīkatā mahāpaññaṁ paripūreti.

ps3.1:9.6 Atītānāgatapaccuppanne rūpe anattānupassanā bhāvitā bahulīkatā javanapaññaṁ paripūreti.

ps3.1:9.7 Rūpe nibbidānupassanā bhāvitā bahulīkatā tikkhapaññaṁ paripūreti.

ps3.1:9.8 Atītānāgatapaccuppanne rūpe nibbidānupassanā bhāvitā bahulīkatā javanapaññaṁ paripūreti.

ps3.1:9.9 Rūpe virāgānupassanā bhāvitā bahulīkatā vipulapaññaṁ paripūreti.

ps3.1:9.10 Atītānāgatapaccuppanne rūpe virāgānupassanā bhāvitā bahulīkatā javanapaññaṁ paripūreti.

ps3.1:9.11 Rūpe nirodhānupassanā bhāvitā bahulīkatā gambhīrapaññaṁ paripūreti.

ps3.1:9.12 Atītānāgatapaccuppanne rūpe nirodhānupassanā bhāvitā bahulīkatā javanapaññaṁ paripūreti.

ps3.1:9.13 Rūpe paṭinissaggānupassanā bhāvitā bahulīkatā asāmantapaññaṁ paripūreti.

ps3.1:9.14 Atītānāgatapaccuppanne rūpe paṭinissaggānupassanā bhāvitā bahulīkatā javanapaññaṁ paripūreti.

ps3.1:9.15 Imā satta paññā bhāvitā bahulīkatā paṇḍiccaṁ paripūrenti.

ps3.1:9.16 Imā aṭṭha paññā bhāvitā bahulīkatā puthupaññaṁ paripūrenti.

ps3.1:9.17 Imā nava paññā bhāvitā bahulīkatā hāsapaññaṁ paripūrenti.