3.10. Mātikākathā

ps3.10:16.1 <b>Bhāvanā adhiṭṭhānaṁ jīvitan</b>ti kāmacchandaṁ pajahanto nekkhammaṁ bhāvetīti—

ps3.10:16.2 bhāvanāsampanno.

ps3.10:16.3 Nekkhammavasena cittaṁ adhiṭṭhātīti—

ps3.10:16.4 adhiṭṭhānasampanno.

ps3.10:16.5 Svāyaṁ evaṁ bhāvanāsampanno adhiṭṭhānasampanno samaṁ jīvati, no visamaṁ;

ps3.10:16.6 sammā jīvati, no micchā;

ps3.10:16.7 visuddhaṁ jīvati, no kiliṭṭhanti—

ps3.10:16.8 ājīvasampanno.

ps3.10:16.9 Svāyaṁ evaṁ bhāvanāsampanno adhiṭṭhānasampanno ājīvasampanno yaññadeva parisaṁ upasaṅkamati—

ps3.10:16.10 yadi khattiyaparisaṁ yadi brāhmaṇaparisaṁ yadi gahapatiparisaṁ yadi samaṇaparisaṁ—

ps3.10:16.11 visārado upasaṅkamati amaṅkubhūto.

ps3.10:16.12 Taṁ kissa hetu?

ps3.10:16.13 Tathā hi so bhāvanāsampanno adhiṭṭhānasampanno ājīvasampanno.