2.4. Mettākathā

ps2.4:19.1 Imāni pañca balāni mettāya cetovimuttiyā āsevanā honti.

ps2.4:19.2 Imehi pañcahi balehi mettācetovimutti āsevīyati.

ps2.4:19.3 Imāni pañca balāni mettāya cetovimuttiyā bhāvanā honti.

ps2.4:19.4 Imehi pañcahi balehi mettācetovimutti bhāvīyati.

ps2.4:19.5 Imāni pañca balāni mettāya cetovimuttiyā bahulīkatā honti.

ps2.4:19.6 Imehi pañcahi balehi mettācetovimutti bahulīkarīyati.

ps2.4:19.7 Imāni pañca balāni mettāya cetovimuttiyā alaṅkārā honti.

ps2.4:19.8 Imehi pañcahi balehi mettācetovimutti svālaṅkatā hoti.

ps2.4:19.9 Imāni pañca balāni mettāya cetovimuttiyā parikkhārā honti.

ps2.4:19.10 Imehi pañcahi balehi mettācetovimutti suparikkhatā hoti.

ps2.4:19.11 Imāni pañca balāni mettāya cetovimuttiyā parivārā honti.

ps2.4:19.12 Imehi pañcahi balehi mettācetovimutti suparivutā hoti.

ps2.4:19.13 Imāni pañca balāni mettāya cetovimuttiyā āsevanā honti, bhāvanā honti, bahulīkatā honti, alaṅkārā honti, parikkhārā honti, parivārā honti, pāripūrī honti, sahagatā honti, sahajātā honti, saṁsaṭṭhā honti, sampayuttā honti, pakkhandanā honti, pasīdanā honti, santiṭṭhanā honti, vimuccanā honti, “etaṁ santan”ti phassanā honti, yānīkatā honti, vatthukatā honti, anuṭṭhitā honti, paricitā honti, susamāraddhā honti, subhāvitā honti, svādhiṭṭhitā honti, susamuggatā honti, suvimuttā honti nibbattenti jotenti patāpenti.