1.8. Vipallāsakathā

ps1.8:1.1 Purimanidānaṁ.

ps1.8:1.2 “Cattārome, bhikkhave, saññāvipallāsā cittavipallāsā diṭṭhivipallāsā.

ps1.8:1.3 Katame cattāro?

ps1.8:1.4 Anicce, bhikkhave, niccanti saññāvipallāso cittavipallāso diṭṭhivipallāso.

ps1.8:1.5 Dukkhe, bhikkhave, sukhanti saññāvipallāso cittavipallāso diṭṭhivipallāso.

ps1.8:1.6 Anattani, bhikkhave, attāti saññāvipallāso cittavipallāso diṭṭhivipallāso.

ps1.8:1.7 Asubhe, bhikkhave, subhanti saññāvipallāso cittavipallāso diṭṭhivipallāso.

ps1.8:1.8 Ime kho, bhikkhave, cattāro saññāvipallāsā cittavipallāsā diṭṭhivipallāsā.