1.5. Vimokkhakathā

ps1.5:54.1 Katamo <b>anupādā cittassa vimokkho?</b>

ps1.5:54.2 Siyā eko anupādācittassa vimokkho dasa anupādācittassa vimokkhā honti, dasa anupādācittassa vimokkhā eko anupādācittassa vimokkho hoti vatthuvasena pariyāyena <b>siyā</b>ti.

ps1.5:54.3 Kathañca siyā?

ps1.5:54.4 Aniccānupassanañāṇaṁ niccato upādānā muccatīti—

ps1.5:54.5 anupādācittassa vimokkho.

ps1.5:54.6 Dukkhānupassanañāṇaṁ sukhato upādānā muccatīti—

ps1.5:54.7 anupādācittassa vimokkho.

ps1.5:54.8 Anattānupassanañāṇaṁ attato upādānā muccatīti—

ps1.5:54.9 anupādācittassa vimokkho.

ps1.5:54.10 Nibbidānupassanañāṇaṁ nandiyā upādānā muccatīti—

ps1.5:54.11 anupādācittassa vimokkho.

ps1.5:54.12 Virāgānupassanañāṇaṁ rāgato upādānā muccatīti—

ps1.5:54.13 anupādācittassa vimokkho.

ps1.5:54.14 Nirodhānupassanañāṇaṁ samudayato upādānā muccatīti—

ps1.5:54.15 anupādācittassa vimokkho.

ps1.5:54.16 Paṭinissaggānupassanañāṇaṁ ādānato upādānā muccatīti—

ps1.5:54.17 anupādācittassa vimokkho.

ps1.5:54.18 Animittānupassanañāṇaṁ nimittato upādānā muccatīti—

ps1.5:54.19 anupādācittassa vimokkho.

ps1.5:54.20 Appaṇihitānupassanañāṇaṁ paṇidhiyā upādānā muccatīti—

ps1.5:54.21 anupādācittassa vimokkho.

ps1.5:54.22 Suññatānupassanañāṇaṁ abhinivesato upādānā muccatīti—

ps1.5:54.23 anupādācittassa vimokkho.

ps1.5:54.24 Evaṁ siyā eko anupādācittassa vimokkho dasa anupādācittassa vimokkhā honti, dasa anupādācittassa vimokkhā eko anupādācittassa vimokkho hoti vatthuvasena pariyāyena.