1.5. Vimokkhakathā

ps1.5:17.1 Kathaṁ <b>ajjhattaṁ arūpasaññī bahiddhā rūpāni passatīti—vimokkho?</b>

ps1.5:17.2 Idhekacco ajjhattaṁ paccattaṁ nīlanimittaṁ na manasikaroti, nīlasaññaṁ na paṭilabhati;

ps1.5:17.3 bahiddhā nīlanimitte cittaṁ upasaṁharati, nīlasaññaṁ paṭilabhati.

ps1.5:17.4 So taṁ nimittaṁ suggahitaṁ karoti, sūpadhāritaṁ upadhāreti, svāvatthitaṁ avatthāpeti.

ps1.5:17.5 So taṁ nimittaṁ suggahitaṁ katvā sūpadhāritaṁ upadhāretvā svāvatthitaṁ avatthāpetvā āsevati bhāveti bahulīkaroti.

ps1.5:17.6 Tassa evaṁ hoti—

ps1.5:17.7 “ajjhattaṁ arūpaṁ, bahiddhā rūpamidan”ti, rūpasaññī hoti.

ps1.5:17.8 Idhekacco ajjhattaṁ paccattaṁ pītanimittaṁ …pe…

ps1.5:17.9 lohitanimittaṁ …pe…

ps1.5:17.10 odātanimittaṁ na manasikaroti, odātasaññaṁ na paṭilabhati;

ps1.5:17.11 bahiddhā odātanimitte cittaṁ upasaṁharati, odātasaññaṁ paṭilabhati.

ps1.5:17.12 So taṁ nimittaṁ suggahitaṁ karoti, sūpadhāritaṁ upadhāreti, svāvatthitaṁ avatthāpeti.

ps1.5:17.13 So taṁ nimittaṁ suggahitaṁ katvā sūpadhāritaṁ upadhāretvā svāvatthitaṁ avatthāpetvā āsevati bhāveti bahulīkaroti.

ps1.5:17.14 Tassa evaṁ hoti—

ps1.5:17.15 “ajjhattaṁ arūpaṁ bahiddhā rūpamidan”ti, rūpasaññī hoti.

ps1.5:17.16 Evaṁ ajjhattaṁ arūpasaññī bahiddhā rūpāni passatīti—

ps1.5:17.17 vimokkho.