1.4. Indriyakathā

ps1.4:77.0 1.4.4.6. Patiṭṭhāpakaṭṭhaniddesa

ps1.4:77.1 Kathaṁ <b>patiṭṭhāpakaṭṭhena indriyāni daṭṭhabbāni?</b>

ps1.4:77.2 Saddho saddhindriyaṁ adhimokkhe patiṭṭhāpeti, saddhassa saddhindriyaṁ adhimokkhe patiṭṭhāpeti.

ps1.4:77.3 Vīriyavā vīriyindriyaṁ paggahe patiṭṭhāpeti, vīriyavato vīriyindriyaṁ paggahe patiṭṭhāpeti.

ps1.4:77.4 Satimā satindriyaṁ upaṭṭhāne patiṭṭhāpeti, satimato satindriyaṁ upaṭṭhāne patiṭṭhāpeti.

ps1.4:77.5 Samāhito samādhindriyaṁ avikkhepe patiṭṭhāpeti, samāhitassa samādhindriyaṁ avikkhepe patiṭṭhāpeti.

ps1.4:77.6 Paññavā paññindriyaṁ dassane patiṭṭhāpeti, paññavato paññindriyaṁ dassane patiṭṭhāpeti.

ps1.4:77.7 Yogāvacaro pañcindriyāni nekkhamme patiṭṭhāpeti, yogāvacarassa pañcindriyāni nekkhamme patiṭṭhāpenti.

ps1.4:77.8 Yogāvacaro pañcindriyāni abyāpāde patiṭṭhāpeti, yogāvacarassa pañcindriyāni abyāpāde patiṭṭhāpenti.

ps1.4:77.9 Yogāvacaro pañcindriyāni ālokasaññāya patiṭṭhāpeti, yogāvacarassa pañcindriyāni ālokasaññāya patiṭṭhāpenti.

ps1.4:77.10 Yogāvacaro pañcindriyāni avikkhepe patiṭṭhāpeti, yogāvacarassa pañcindriyāni avikkhepe patiṭṭhāpenti …pe…

ps1.4:77.11 yogāvacaro pañcindriyāni arahattamagge patiṭṭhāpeti, yogāvacarassa pañcindriyāni arahattamagge patiṭṭhāpenti.

ps1.4:77.12 Evaṁ patiṭṭhāpakaṭṭhena indriyāni daṭṭhabbāni.

ps1.4:77.13 Suttantaniddeso catuttho.