1.2. Diṭṭhikathā

ps1.2:91.1 <b>“Neva hoti na na hoti tathāgato paraṁ maraṇā”</b>ti—

ps1.2:91.2 antaggāhikāya diṭṭhiyā katamehi pañcahākārehi abhiniveso hoti?

ps1.2:91.3 Rūpaṁ idheva maraṇadhammaṁ.

ps1.2:91.4 Tathāgato kāyassa bhedā paraṁ maraṇā neva hoti na na hotīti—

ps1.2:91.5 abhinivesaparāmāso diṭṭhi.

ps1.2:91.6 Tāya diṭṭhiyā so anto gahitoti—

ps1.2:91.7 antaggāhikā diṭṭhi.

ps1.2:91.8 Diṭṭhi na vatthu, vatthu na diṭṭhi, aññā diṭṭhi, aññaṁ vatthu.

ps1.2:91.9 Yā ca diṭṭhi yañca vatthu—

ps1.2:91.10 ayaṁ paṭhamā “neva hoti na na hoti tathāgato paraṁ maraṇā”ti—

ps1.2:91.11 antaggāhikā diṭṭhi.

ps1.2:91.12 Antaggāhikā diṭṭhi micchādiṭṭhi …pe…

ps1.2:91.13 imāni saññojanāni, na ca diṭṭhiyo.