1.2. Diṭṭhikathā

ps1.2:60.1 Kathaṁ <b>viññāṇaṁ attato samanupassati?</b>

ps1.2:60.2 Idhekacco cakkhuviññāṇaṁ …

ps1.2:60.3 sotaviññāṇaṁ …

ps1.2:60.4 ghānaviññāṇaṁ …

ps1.2:60.5 jivhāviññāṇaṁ kāyaviññāṇaṁ …

ps1.2:60.6 manoviññāṇaṁ attato samanupassati.

ps1.2:60.7 “Yaṁ manoviññāṇaṁ, so ahaṁ;

ps1.2:60.8 yo ahaṁ, taṁ manoviññāṇan”ti—

ps1.2:60.9 manoviññāṇañca attañca advayaṁ samanupassati.

ps1.2:60.10 Seyyathāpi telappadīpassa jhāyato “yā acci so vaṇṇo, yo vaṇṇo sā accī”ti—

ps1.2:60.11 acciñca vaṇṇañca advayaṁ samanupassati.

ps1.2:60.12 Evamevaṁ idhekacco manoviññāṇaṁ attato samanupassati.

ps1.2:60.13 “Yaṁ manoviññāṇaṁ, so ahaṁ;

ps1.2:60.14 yo ahaṁ taṁ manoviññāṇan”ti—

ps1.2:60.15 manoviññāṇañca attañca advayaṁ samanupassati.

ps1.2:60.16 Abhinivesaparāmāso diṭṭhi.

ps1.2:60.17 Diṭṭhi na vatthu, vatthu na diṭṭhi.

ps1.2:60.18 Aññā diṭṭhi, aññaṁ vatthu.

ps1.2:60.19 Yā ca diṭṭhi yañca vatthu—

ps1.2:60.20 ayaṁ paṭhamā viññāṇavatthukā attānudiṭṭhi.

ps1.2:60.21 Attānudiṭṭhi micchādiṭṭhi …pe…

ps1.2:60.22 imāni saññojanāni, na ca diṭṭhiyo.

ps1.2:60.23 Evaṁ viññāṇaṁ attato samanupassati.