1.2. Diṭṭhikathā

ps1.2:56.1 Kathaṁ <b>saṅkhāre attato samanupassati?</b>

ps1.2:56.2 Idhekacco cakkhusamphassajaṁ cetanaṁ sotasamphassajaṁ cetanaṁ ghānasamphassajaṁ cetanaṁ jivhāsamphassajaṁ cetanaṁ kāyasamphassajaṁ cetanaṁ manosamphassajaṁ cetanaṁ attato samanupassati.

ps1.2:56.3 “Yā manosamphassajā cetanā, so ahaṁ;

ps1.2:56.4 yo ahaṁ sā manosamphassajā cetanā”ti—

ps1.2:56.5 manosamphassajaṁ cetanañca attañca advayaṁ samanupassati.

ps1.2:56.6 Seyyathāpi telappadīpassa jhāyato “yā acci so vaṇṇo, yo vaṇṇo sā accī”ti—

ps1.2:56.7 acciñca vaṇṇañca advayaṁ samanupassati.

ps1.2:56.8 Evamevaṁ idhekacco manosamphassajaṁ cetanaṁ attato samanupassati.

ps1.2:56.9 “Yā manosamphassajā cetanā so ahaṁ, yo ahaṁ sā manosamphassajā cetanā”ti—

ps1.2:56.10 manosamphassajaṁ cetanañca attañca advayaṁ samanupassati.

ps1.2:56.11 Abhinivesaparāmāso diṭṭhi.

ps1.2:56.12 Diṭṭhi na vatthu, vatthu na diṭṭhi.

ps1.2:56.13 Aññā diṭṭhi, aññaṁ vatthu.

ps1.2:56.14 Yā ca diṭṭhi yañca vatthu—

ps1.2:56.15 ayaṁ paṭhamā saṅkhāravatthukā attānudiṭṭhi.

ps1.2:56.16 Attānudiṭṭhi micchādiṭṭhi …pe…

ps1.2:56.17 imāni saññojanāni, na ca diṭṭhiyo.

ps1.2:56.18 Evaṁ saṅkhāre attato samanupassati.