1.2. Diṭṭhikathā

ps1.2:43.1 Kathaṁ <b>rūpaṁ attato samanupassati?</b>

ps1.2:43.2 Idhekacco pathavīkasiṇaṁ attato samanupassati—

ps1.2:43.3 “yaṁ pathavīkasiṇaṁ, so ahaṁ;

ps1.2:43.4 yo ahaṁ, taṁ pathavīkasiṇan”ti.

ps1.2:43.5 Pathavīkasiṇañca attañca advayaṁ samanupassati.

ps1.2:43.6 Seyyathāpi telappadīpassa jhāyato “yā acci so vaṇṇo, yo vaṇṇo sā accī”ti—

ps1.2:43.7 acciñca vaṇṇañca advayaṁ samanupassati.

ps1.2:43.8 Evamevaṁ idhekacco pathavīkasiṇaṁ attato samanupassati—

ps1.2:43.9 “yaṁ pathavīkasiṇaṁ, so ahaṁ;

ps1.2:43.10 yo ahaṁ, taṁ pathavīkasiṇan”ti.

ps1.2:43.11 Pathavīkasiṇañca attañca advayaṁ samanupassati.

ps1.2:43.12 Abhinivesaparāmāso diṭṭhi.

ps1.2:43.13 Diṭṭhi na vatthu, vatthu na diṭṭhi.

ps1.2:43.14 Aññā diṭṭhi, aññaṁ vatthu.

ps1.2:43.15 Yā ca diṭṭhi yañca vatthu—

ps1.2:43.16 ayaṁ paṭhamā rūpavatthukā attānudiṭṭhi.

ps1.2:43.17 Attānudiṭṭhi micchādiṭṭhi diṭṭhivipatti …pe…

ps1.2:43.18 attānudiṭṭhi micchādiṭṭhi.

ps1.2:43.19 Micchādiṭṭhikassa purisapuggalassa dveva gatiyo …pe…

ps1.2:43.20 imāni saññojanāni, na ca diṭṭhiyo.