1.2. Diṭṭhikathā

ps1.2:31.1 Assādadiṭṭhi micchādiṭṭhi diṭṭhivipatti.

ps1.2:31.2 Tāya diṭṭhivipattiyā samannāgato puggalo diṭṭhivipanno.

ps1.2:31.3 Diṭṭhivipanno puggalo na sevitabbo na bhajitabbo na payirupāsitabbo.

ps1.2:31.4 Taṁ kissa hetu?

ps1.2:31.5 Diṭṭhi hissa pāpikā.

ps1.2:31.6 Yo diṭṭhiyā rāgo, so na diṭṭhi.

ps1.2:31.7 Diṭṭhi na rāgo.

ps1.2:31.8 Aññā diṭṭhi, añño rāgo.

ps1.2:31.9 Yā ca diṭṭhi yo ca rāgo—

ps1.2:31.10 ayaṁ vuccati diṭṭhirāgo.

ps1.2:31.11 Tāya ca diṭṭhiyā tena ca rāgena samannāgato puggalo diṭṭhirāgaratto.

ps1.2:31.12 Diṭṭhirāgaratte puggale dinnaṁ dānaṁ na mahapphalaṁ hoti na mahānisaṁsaṁ.

ps1.2:31.13 Taṁ kissa hetu?

ps1.2:31.14 Diṭṭhi hissa pāpikā assādadiṭṭhi micchādiṭṭhi.