ps1.1:393.1 Kathaṁ dhamme bahiddhā vavattheti?
BAGIAN 393
ps1.1:393.2 Dhammā avijjāsambhūtāti vavattheti, dhammā taṇhāsambhūtāti vavattheti, dhammā kammasambhūtāti vavattheti, dhammā āhārasambhūtāti vavattheti, dhammā uppannāti vavattheti, dhammā samudāgatāti vavattheti.
ps1.1:393.3 Dhammā ahutvā sambhūtā, hutvā na bhavissantīti vavattheti.
ps1.1:393.4 Dhamme antavantato vavattheti, dhammā addhuvā asassatā vipariṇāmadhammāti vavattheti, dhammā aniccā saṅkhatā paṭiccasamuppannā khayadhammā vayadhammā virāgadhammā nirodhadhammāti vavattheti.
ps1.1:393.5 Dhamme aniccato vavattheti, no niccato;
ps1.1:393.6 dukkhato vavattheti, no sukhato;
ps1.1:393.7 anattato vavattheti, no attato;
ps1.1:393.8 nibbindati, no nandati;
ps1.1:393.9 virajjati, no rajjati;
ps1.1:393.10 nirodheti, no samudeti;
ps1.1:393.11 paṭinissajjati, no ādiyati …pe…
ps1.1:393.12 aniccato vavatthento niccasaññaṁ pajahati, dukkhato vavatthento sukhasaññaṁ pajahati, anattato vavatthento attasaññaṁ pajahati, nibbindanto nandiṁ pajahati, virajjanto rāgaṁ pajahati, nirodhento samudayaṁ pajahati, paṭinissajjanto ādānaṁ pajahati.
ps1.1:393.13 Evaṁ dhamme bahiddhā vavattheti.
ps1.1:393.14 Taṁ ñātaṭṭhena ñāṇaṁ, pajānanaṭṭhena paññā.
ps1.1:393.15 Tena vuccati—
ps1.1:393.16 “bahiddhā vavatthāne paññā gocaranānatte ñāṇaṁ”.
ps1.1:393.17 Gocaranānattañāṇaniddeso soḷasamo.