pe9:53.1 Kathaṁ aṭṭhārasa mūlapadāni sīhavikkīḷite naye yujjanti?
BAGIAN 53
pe9:53.2 Taṇhā ca subhasaññā ca, ayaṁ paṭhamo vipallāso.
pe9:53.3 Lobho ca sukhasaññā ca, ayaṁ dutiyo vipallāso.
pe9:53.4 Avijjā ca niccasaññā ca, ayaṁ tatiyo vipallāso.
pe9:53.5 Moho ca attasaññā ca, ayaṁ catuttho vipallāso.
pe9:53.6 Iti nava padāni akusalamūlāni catūsu padesu yojitāni.
pe9:53.7 Tattha navannaṁ mūlapadānaṁ kusalānaṁ samatho ca asubhasaññā ca, idaṁ paṭhamaṁ satipaṭṭhānaṁ.
pe9:53.8 Alobho ca dukkhasaññā ca, idaṁ dutiyaṁ satipaṭṭhānaṁ.
pe9:53.9 Vipassanā ca aniccasaññā ca, idaṁ tatiyaṁ satipaṭṭhānaṁ.
pe9:53.10 Amoho ca anattasaññā ca, idaṁ catutthaṁ satipaṭṭhānaṁ.
pe9:53.11 Imāni aṭṭhārasa mūlapadāni sīhavikkīḷitanayaṁ anupaviṭṭhāni.
pe9:53.12 Imesaṁ tiṇṇaṁ nayānaṁ yā bhūmi ca yo rāgo ca yo doso ca ekaṁ nayaṁ pavisati.
pe9:53.13 Ekassa nayassa akusale vā dhamme kusale vā dhamme viññāte paṭipakkho anvesitabbo, paṭipakkhe anvesitvā so nayo niddisitabbo, tamhi naye niddiṭṭho.
pe9:53.14 Yathā ekamhi naye sabbe nayā paviṭṭhā tathā niddisitabbā.
pe9:53.15 Ekamhi ca naye aṭṭhārasa mūlapadāni paviṭṭhāni, tamhi dhamme viññāte sabbe dhammā viññātā honti.
pe9:53.16 Imesaṁ tiṇṇaṁ nayānaṁ sīhavikkīḷitanayassa cattāri phalāni pariyosānaṁ.
pe9:53.17 Paṭhamāya disāya paṭhamaṁ phalaṁ, dutiyāya disāya dutiyaṁ phalaṁ, tatiyāya disāya tatiyaṁ phalaṁ, catutthāya disāya catutthaṁ phalaṁ.
pe9:53.18 Tipukkhalassa nayassa tīṇi vimokkhamukhāni pariyosānaṁ.
pe9:53.19 Paṭhamāya disāya appaṇihitaṁ, dutiyāya disāya suññataṁ, tatiyāya disāya animittaṁ.
pe9:53.20 Nandiyāvaṭṭassa nayassa rāgavirāgā cetovimutti avijjāvirāgā ca paññāvimutti pariyosānaṁ.
pe9:53.21 Paṭhamāya disāya rāgavirāgā cetovimutti, dutiyāya disāya avijjāvirāgā paññāvimutti.
pe9:53.22 Ime tayo nayā imesaṁ tiṇṇaṁ nayānaṁ aṭṭhārasannaṁ mūlapadānaṁ ālokanā, ayaṁ vuccati disālokano nayo.
pe9:53.23 Āloketvāna jānāti “ayaṁ dhammo imaṁ dhammaṁ bhajatī”ti sammā yojanā.
pe9:53.24 Kusalapakkhe akusalapakkhe ca ayaṁ nayo aṅkuso nāma.
pe9:53.25 Ime pañca nayā.