pe8:71.1 Uddhaṁ adho sabbadhi vītarāgoti gāthā.
BAGIAN 71
pe8:71.2 Tattha kiṁ uddhaṁ nāma?
pe8:71.3 Yaṁ ito uddhaṁ bhavissati anāgāmī, idaṁ uddhaṁ.
pe8:71.4 Adho nāma yamatikkantamatītaṁ, idamavoca apadānatanti uddhaṁ.
pe8:71.5 Tattha atītena sassatadiṭṭhi pubbantākappikānaṁ aparantadiṭṭhi kesañci, ucchedadiṭṭhiṁ yaṁ vuttakappikānaṁ imā ceva diṭṭhiyo ucchedadiṭṭhi ca sassatadiṭṭhi ca.
pe8:71.6 Tatthāyaṁ sassatadiṭṭhi imāni pannarasa padāni sakkāyadiṭṭhi sassataṁ bhajanti.
pe8:71.7 Rūpavantaṁ me attā, attani me rūpaṁ, rūpaṁ me attāti yaduccate paññaṁ paridahanti.
pe8:71.8 Yā ucchedadiṭṭhi sā pañcasatāni ucchedaṁ bhajanti.
pe8:71.9 Te “taṁ jīvaṁ taṁ sarīran”ti passanti, rūpaṁ me attāti tathārūpā catubbidhā sakkāyadiṭṭhi ucchedena ca sassatena ca.
pe8:71.10 Evaṁ pañcasu khandhesu vīsativatthukāya diṭṭhiyā pannarasa padāni pubbantaṁ bhajanti.
pe8:71.11 Sassatadiṭṭhiyā pañca padāni aparantaṁ bhajanti ucchedadiṭṭhiyā.
pe8:71.12 Tattha “ayamahamasmī”ti passantā rūpaṁ attato samanupassati, so ucchedavādī rūpavantañca attānaṁ, attani ca rūpaṁ, rūpasmiṁ vā attāti so passati cāti iti ucchedadiṭṭhi ca, attato paṭissarati sassatadiṭṭhi pubbantato ca paṭissarati.
pe8:71.13 “Ayamahamasmī”ti na samanupassati.
pe8:71.14 Tassa diṭṭhāsavā pahānaṁ gacchanti.
pe8:71.15 Yo tīsu addhāsu pubbante ca aparante ca tena tena niddiṭṭhānena uddhaṁ adho sabbadhi vītarāgo “ahamasmī”ti na anupassatīti iminā dvārena iminā payogena iminā upāyena idaṁ dassanabhūmi ca sotāpattiphalañca so ariyo payogo anabhāvaṅgatena saṁsārena apunabbhavāti yo koci ariyo payogo punabbhavāya mudūni vā pañcindriyāni majjhāni adhimattāni vā sabbaṁ apunabbhavappahānāya saṁvattanti.
pe8:71.16 Ahanti diṭṭhogho kāmogho bhavogho avijjogho ca odhiso.
pe8:71.17 Tattha desanāhārena cattāri saccāni pañcahi indriyehi sotāpattiphalena ca dve saccāni maggo ca nirodho ca.
pe8:71.18 Sakkāyasamudayena dve saccāni dukkhañca samudayo ca, ayaṁ desanā hāro.