pe6:54.1 Tattha ariyasāvako dukkhaṁ pariññābhisamayena abhisameti, samudayaṁ pahānābhisamayena abhisameti, nirodhaṁ sacchikiriyābhisamayena abhisameti, maggaṁ bhāvanābhisamayena abhisameti.
BAGIAN 54
pe6:54.2 Kiṅkāraṇaṁ?
pe6:54.3 Dukkhassa pariññābhisamayo, samudayassa pahānābhisamayo, nirodhassa sacchikiriyābhisamayo, maggassa bhāvanābhisamayo.
pe6:54.4 Samathavipassanāya kathaṁ abhisameti?
pe6:54.5 Ārammaṇe cittaṁ upanibandhetvā pañcakkhandhe dukkhato passati.
pe6:54.6 Tattha yo upanibandho, ayaṁ samatho.
pe6:54.7 Yā pariyogāhanā, ayaṁ vipassanā.
pe6:54.8 Pañcakkhandhe dukkhāti passato yo pañcakkhandhesu ālayo nikanti upagamanaṁ ajjhosānā icchā mucchā paṇidhi patthanā pahīyati.
pe6:54.9 Tattha pañcakkhandhā dukkhaṁ.
pe6:54.10 Yo tattha ālayo nikanti upagamanaṁ ajjhosānaṁ icchā mucchā paṇidhi patthanā, ayaṁ samudayo.
pe6:54.11 Yaṁ tassa pahānaṁ, so nirodho samatho vipassanā ca maggo, evaṁ tesaṁ catunnaṁ ariyasaccānaṁ ekakāle ekakkhaṇe ekacitte apubbaṁ acarimaṁ abhisamayo bhavati.
pe6:54.12 Tenāha bhagavā “sahasaccābhisamayā ariyasāvakassa tīṇi saṁyojanāni pahīyantī”ti.