pe5:53.1 Tattha dhātūnaṁ aṭṭhārasa dhātuyo.
BAGIAN 53
pe5:53.2 Tattha yā rūpī dasa dhātuyo, tāsu desiyamānāsu rūpakkhandho niddisitabbo, dukkhaṁ ariyasaccaṁ.
pe5:53.3 Yepi ca cha viññāṇakāyā manodhātusattamā, tattha viññāṇakkhandho ca niddisitabbo, dukkhaṁ ariyasaccaṁ.
pe5:53.4 Dhammadhātu pana dhammasamosaraṇā, so dhammo hetunā ca nissandena ca phalena ca kiccena ca vevacanena ca yena yena upalabbhati, tena tena niddisitabbo.
pe5:53.5 Yadi vā kusalā yadi vā akusalā yadi vā abyākatā yadi vā asaṅkhatā.
pe5:53.6 Dvādasannaṁ āyatanānaṁ dasa āyatanāni rūpāni taṁ dukkhaṁ ariyasaccaṁ niddisitabbaṁ.
pe5:53.7 Rūpakkhandho ca manāyatanañca viññāṇakkhandhena niddisitabbaṁ, dukkhaṁ ariyasaccaṁ.
pe5:53.8 Dhammāyatanaṁ nānādhammasamosaraṇaṁ.
pe5:53.9 Tattha ye dhammā indriyānaṁ indriyesu niddisitabbā, ye anindriyānaṁ anindriyesu niddisitabbā.
pe5:53.10 Pariyāyato ca otāretabbā.
pe5:53.11 Yathā sā dhammadhātu tathā dhammāyatanaṁ pariyesitabbaṁ.
pe5:53.12 Yāyeva hi dhammadhātu tadeva dhammāyatanaṁ anūnaṁ anadhikaṁ.