pe4:5.1 Tattha kusale desite sutte byākaraṇe vā saṅkilesā na yujjanti ariyadhammā vā, te mahāpadese niddisitabbāvayavena apakaḍḍhitabbā.
BAGIAN 5
pe4:5.2 Tattha kilesehi ca desitehi ariyadhammesu ca yadipi tena ariyadhammena te kilesā pahānaṁ gacchanti.
pe4:5.3 Tatthapi uttari upaparikkhitabbaṁ.
pe4:5.4 Kena kāraṇena ete kilesā pajahitabbā, kena kāraṇena ariyadhammā desitāti?
pe4:5.5 Yena yena vā ākārena ariyadhammā desitā, tena tena pakārena ayaṁ kileso ṭhito.
pe4:5.6 Atthi hi eko kileso, tena vā ariyadhammā na aññathā aññathā pahātabbo, yathā diṭṭhi rāgo avijjā ca dassanena pahātabbā.
pe4:5.7 Sā ce evañca avijjā bhāvanāya bhūmi vā dhammā bhāvanāya pahātabbā.
pe4:5.8 Sāyeva uddhambhāgiyaṁ asaṅkhatadassanāya vimuttiyā animittena cetosamādhinā amanasikārena pahīyati.
pe4:5.9 Evaṁ sātthaṁ sabyañjanaṁ upaparikkhitabbaṁ.
pe4:5.10 Ye dassanena pahātabbā kilesā dassanākārena ariyadhammo desito, bhāvanāya pahātabbā bhāvanākārena ariyadhammo desito, patisevanā pahātabbā patisevanākārena ariyadhammo desito, evaṁ vinodanapahātabbā yāva satta āsavā kātabbā, yāvaññathā.
pe4:5.11 Aññathā hesa dhammo pahātabbo aññenākārena ariyadhammo desito, so ariyadhammo aññathā pariyesitabbo.
pe4:5.12 Yadi ayaṁ dhammo pariyesato yo ca deseti yena yenākārena, so ariyadhammo pariyesitabbo, tenākārena kileso pahīyati.
pe4:5.13 So tattha upaparikkhitabbo.
pe4:5.14 Atha na yujjati yadi hi tena suttena vihitaṁ suttaṁ vīmaṁsitabbaṁ.
pe4:5.15 Yathā yujjati, tathā gahetabbaṁ.
pe4:5.16 Yathā na yujjati, tathā na gahetabbaṁ, addhā etaṁ bhagavatā na bhāsitaṁ, āyasmatā vā duggahitaṁ, yathā mahāpadese niddisitabbaṁ, bhagavatā yathābhūtaṁ desitaṁ, yo ca dhammo desito kusalo ca akusalo ca tassa dhammassa paccayo pariyesitabbo.
pe4:5.17 Na hi paccayā vinā dhammo appaccayo uppajjati.
pe4:5.18 Tattha ko ākāro pariyesanāya?