pe3:35.1 Tīṇimāni, bhikkhave, indriyāni anaññātaññassāmītindriyaṁ aññindriyaṁ aññātāvindriyaṁ.
BAGIAN 35
pe3:35.2 Tattha katamaṁ anaññātaññassāmītindriyaṁ?
pe3:35.3 Idha, bhikkhave, bhikkhu anabhisametassa dukkhassa ariyasaccassa abhisamayāya chandaṁ janeti vāyamati, vīriyaṁ ārabhati, cittaṁ paggaṇhāti padahati.
pe3:35.4 Evaṁ catunnaṁ ariyasaccānaṁ kātabbaṁ.
pe3:35.5 Tattha katamaṁ aññindriyaṁ?
pe3:35.6 Idha, bhikkhave, bhikkhu “idaṁ dukkhaṁ ariyasaccan”ti yathābhūtaṁ pajānāti, yā ca maggo, idaṁ aññindriyaṁ.
pe3:35.7 Āsavakkhayā anāsavo hoti, idaṁ vuccati aññātāvindriyaṁ.
pe3:35.8 Tathāyaṁ paññā, ayaṁ hetu.
pe3:35.9 Yaṁ chandaṁ janeti vāyamati, yā pajānāti, ayaṁ nissando.
pe3:35.10 Yena sabbaso āsavānaṁ khayā hetu, yaṁ khaye ñāṇamuppajjati, anuppāde ñāṇañca, ayaṁ nissando.
pe3:35.11 Yaṁ arahattaṁ, idaṁ phalaṁ.
pe3:35.12 Tattha khīṇā me jāti, vusitaṁ brahmacariyaṁ, kataṁ karaṇīyanti, idaṁ khaye ñāṇaṁ.
pe3:35.13 Nāparaṁ itthattāyāti pajānāmīti idaṁ anuppāde ñāṇaṁ.
pe3:35.14 Iti imāni indriyāni amoho niddiṭṭho hetunā ca nissandena ca phalena ca.
pe3:35.15 Imāni asādhāraṇāni niddiṭṭhāni.