pe2:33.1 Tatthāyaṁ diṭṭheva dhamme pāpuṇāti, ayaṁ nibbedho.
BAGIAN 33
pe2:33.2 Yaṁ samparāye paccekabodhiṁ pāpuṇāti, ayaṁ vāsanā.
pe2:33.3 Imāni soḷasa suttāni sabbasāsanaṁ atiggaṇhanto tiṭṭhanti.
pe2:33.4 Imehi soḷasahi suttehi navavidho suttanto vibhatto bhavati.
pe2:33.5 So ca paññavato no duppaññassa, yuttassa no ayuttassa, akammassa vihārissa pakatiyā loke saṅkileso carati.
pe2:33.6 So saṅkileso tividho—
pe2:33.7 taṇhāsaṅkileso diṭṭhisaṅkileso duccaritasaṅkileso.
pe2:33.8 Tato saṅkilesato uṭṭhahanto saṅkileso dhammesu patiṭṭhahati, lokiyesu patiṭṭhahatīti.
pe2:33.9 Tatthākusalo diṭṭhato sace taṁ sīlañca diṭṭhiñca parāmasati, tassa so taṇhāsaṅkileso hoti.
pe2:33.10 Sace panassa evaṁ hoti “imināhaṁ sīlena vā vatena vā brahmacariyena vā devo vā bhavissaṁ devaññataro vā”ti yassa hoti micchādiṭṭhi, etassa micchādiṭṭhisaṅkileso bhavati.
pe2:33.11 Sace pana sīle patiṭṭhito aparāmaṭṭhassa hi sīlavataṁ hoti, tassa taṁ sīlavato yoniso gahitaṁ avippaṭisāraṁ janeti yāva vimuttiñāṇadassanaṁ, tañca tassa diṭṭheva dhamme kālaṅkatassa vā tamhiyeva vā pana aparāpariyāyena vā, aññesu khandhesu evaṁ sutaṁ “sucaritaṁ vāsanāya saṁvattatī”ti vāsanābhāgiyaṁ suttaṁ vuccati.
pe2:33.12 Tattha sīlesu ṭhitassa vinīvaraṇaṁ cittaṁ, taṁ tato sakkāyadiṭṭhippahānāya bhagavā dhammaṁ deseti.
pe2:33.13 So accantaniṭṭhaṁ nibbānaṁ pāpuṇāti;
pe2:33.14 yadi vā sāsanantare, accantaṁ nibbānaṁ pāpuṇāti, yadi vā ekāsane cha abhiññe.
pe2:33.15 Tattha dve puggalā ariyadhamme pāpuṇanti saddhānusārī ca dhammānusārī ca.
pe2:33.16 Tattha dhammānusārī ugghaṭitaññū, saddhānusārī neyyo.
pe2:33.17 Tattha ugghaṭitaññū duvidho—
pe2:33.18 koci tikkhindriyo koci mudindriyo.
pe2:33.19 Tattha neyyopi duvidho—
pe2:33.20 koci tikkhindriyo koci mudindriyo.
pe2:33.21 Tattha yo ca ugghaṭitaññū mudindriyo, yo ca neyyo tikkhindriyo, ime puggalā asamindriyā honti.
pe2:33.22 Tattha ime puggalā samindriyā parihāyanti ca ugghaṭitaññuto, vipañcitaññū neyyato, ime majjhimā bhūmigatā vipañcitaññū hoti.
pe2:33.23 Ime tayo puggalā.