9. Māgaṇḍiyasuttaniddesa

mnd9:32.1 <b>Adiṭṭhiyā assutiyā añāṇā, asīlatā abbatā nopi tenā</b>ti.

mnd9:32.2 Diṭṭhipi icchitabbā.

mnd9:32.3 Dasavatthukā sammādiṭṭhi—

mnd9:32.4 atthi dinnaṁ, atthi yiṭṭhaṁ, atthi hutaṁ, atthi sukatadukkaṭānaṁ kammānaṁ phalaṁ vipāko, atthi ayaṁ loko, atthi paro loko, atthi mātā, atthi pitā, atthi sattā opapātikā, atthi loke samaṇabrāhmaṇā sammaggatā sammāpaṭipannā ye imañca lokaṁ parañca lokaṁ sayaṁ abhiññā sacchikatvā pavedentīti;

mnd9:32.5 savanampi icchitabbaṁ—

mnd9:32.6 parato ghoso, suttaṁ, geyyaṁ, veyyākaraṇaṁ, gāthā, udānaṁ, itivuttakaṁ, jātakaṁ, abbhutadhammaṁ, vedallaṁ;

mnd9:32.7 ñāṇampi icchitabbaṁ—

mnd9:32.8 kammassakatañāṇaṁ, saccānulomikañāṇaṁ, abhiññāñāṇaṁ, samāpattiñāṇaṁ;

mnd9:32.9 sīlampi icchitabbaṁ—

mnd9:32.10 pātimokkhasaṁvaro;

mnd9:32.11 vatampi icchitabbaṁ—

mnd9:32.12 aṭṭha dhutaṅgāni—

mnd9:32.13 āraññikaṅgaṁ, piṇḍapātikaṅgaṁ, paṁsukūlikaṅgaṁ, tecīvarikaṅgaṁ, sapadānacārikaṅgaṁ, khalupacchābhattikaṅgaṁ, nesajjikaṅgaṁ, yathāsanthatikaṅganti.